P&E Dept. in Megawatt 132 tharchhuak thei Tuivai Hydel Project DPR peih fel tawh chu hna bultan nan sum engamawzat dah an rel
Aizawl, June 12th, 2026: Vawiin chhun khan Union Power Minister Manoharlal in May Ni 29, 2026-a Mizoram a rawn tlawh tuma Mizoram Chief Minister Lalduhoma nen-a an thu dahte bawh zui dan tur relin Power & Electricity Department Minister F. Rodingliana kaihhruaina hnuaiah Finance Department leh Planning Department hotute nen P&E Department hmalakna leh hmachhawp hrang hrangte bawhzui dan tur relin an thu khawm.
He meeting-ah hian Tuivai Hydel Project, Tuichang Pump Storage Project leh Pump Storage Project dang siamna tur bakah P&E Department Corporation-a let tura hmalakna kal mek chungchang sawiho a ni.
Power-a intodelh tura Sorkar hmalak mekna leh sum ruahman dan turte ngun taka sawiho a ni a, Megawatt 132 tharchhuak thei Tuivai Hydel Project DPR peih fel tawh chu hna bultan nan sum engamawzat dah rel a ni.
P&E Department Corporatization chungchang pawh sawiho in hmalakna kal mek chu chak zawka bawhzui rel a. Engineer-in-Chief, P&E Department chuan tun ang renga P&E Department-in hma a sawn chhoh a, hma lak mekna Power siam chhuah belh kawnga hlawhtlinna hmuh a nih zel chuan Department hnuaia thawktute pawhin mipui leh sorkar hlawkna tur a nih phawt chuan Corporation anga awm an hnial loh thu a sawi a. Amaherawhchu thawklehkhata tih hlawhtlin nghal vut vut theih a nih loh thu a sawi. Department pawhin Corporate lam hawia hmalakna an kalpui mek thu sawiin Department chu hlawm thum- Transmission, Distribution leh Generation-a then hrang turin Unbundling tih mek a nih thu a sawi bawk.
