Aizawl khawpui enkawl turin tha thar zawk, Kalphungthar, Mipui sorkar kan mamawh. Health Minister
Vawiin Ni 16.4.2026 khan ZPM Thalai General Headquarters buaitsaihin, AMC General Election 2026 puala Street Campaign an neih kal mekah Hlimen leh Hridaikawn-ah Street Campaign an nei a. Health Minister Lalrinpuii, Revenue Minister B. Lalchhanzova, Tourism Minister Lalngjinglova Hmar, Aizawl South-II Bialtu MLA Lalchhuanthanga leh South-III Bialtu MLA Baryl Vanneihsangi Tlau ten thu an sawi.
Health Minister Lalrinpuii chuan, Aizawl Municipal Corporation-ah MNF Party hi kum 10 lai an sorkar tawh avangin an tha a zuai tawh, a ti a. Aizawl khawpui enkawl turin tha thar zawk, Kalphungthar, Mipui sorkar kan mamawh a ni, a ti. MUCHS chungchang sawiin, MUCHS hi tawngkam thiamna hmangin sawichhiat tum thin mahse, a chhawrtu mipui ten a rintlak zia a tak ngeiin an tawng chho zel a, nikum aia Registration punna hi 70% lai a ni a. Central hnuaia Paramilitary Force, Mizoram thawk mekte thleng hian MUCHS hi zawm ve an chak a, zawm ve an rawn dil hial a ti. Golden Card chungchang hi Eptu Party ten an sawi nasa hle a, Golden Card neite hi sowrkar hmasaah chuan Private Hospital ah enkawl an ni ngai lova, kalphungthar ah chuan MUCHS nen Convergence tiin, Private Hospital-ah pawh in enkawl kan phalsak a, Golden Card atan Central atangin Rs. 20 Crore chauh kan dawnga, nikum chhunga Golden Card nei damlo te tana Mizoram sorkar sum sen chu Rs. 56.82 crore zet a ni thung" a ti bawk.
Revenue Minister B. Lalchhanzova pawh in, AMC inthlan puala ZPM Manifesto chungchang sawiin, Kan manifesto ah khan thil pakhat kan rawn ziaka, Apartment Rules siam a ni ang tih a ni a, hei hi Land & Revenue Settlement Department kaihhnawih a ni a, Pathianin rem a tih chuan August thla hian Mizoram Assembly House-ah pharh a ni dawn a, Aizawl Municipal Corporation lo ding thar turin tha taka a enkawl zui theih nan chu dan chu kan rawn pu lut dawn a, he dan hian Aizawl khawpuia in bengbel mek, a bikin Building pakhata floor hrang hrang luahtu te tan a tangkai dawn hle a ni, a ti.
Tourism Minister Lalnghinglova Hmar pawh in, Aizawl-a Tourism tih hmasawnna tur hrang hrang a sawi a, Ward-XIX mipuite pawhin tangkai taka an la chhawr tur Tlangnuam Aizawl City View tih changtlun a nih dawn thu a sawi bawk.
