BJP Mizoram State OB te Prime Minister Narendra Modi tan an tawngtai rual
Vawiin June 10, 2026 khan BJP Mizoram State Offce Bearers chuan, Dr. K Beichhua, MLA, State President kaihhruaina in, Narendra Modi chu India ram Prime Minister atana thlan zinga ni rei ber record a chelh thei leh damna leh hriselna ṭha tak neia hun a la hmang thei chu lawmawm an tih avangin ṭawngṭai rualna hun hman a ni.
BJP Mizoram thuchhuah chuan, Narendra Modi Kum 12 lai mai India ram PM a ni thei chu, BJP National Headquarters chuan India ram pumpui-ah ṭawngṭaisakna hun hmang tura ruahmanna a siam a, chu ruahmanna chu zawmin BJP Mizoram State Office Bearers pawhin Pu Modi tana ṭawngṭaina hun hi vawiin khan State President room-ah an nei a ni.
Ṭawngṭaina hun hmanna a thupui ah, Narendra Modi leh a kaihruaih NDA sorkar chu India ram mipuite ṭhatna atan leh dik taka India ram a kaihhruai zel theih nan te, ram hmasawnna leh mi retheite chhawmdawlna kawngah nasa zawka an thawh chhunzawm zel theih nan te, India ram-ah sakhaw hrang hrang betute zalen taka an awm theih nan te hmangin Pathian hnena ṭawngṭaisakna an nei a. India ram leh a mipuite tana an thawh ṭhat avangin Pathian hnen-a lawmthu sawina pawh an nei bawk.
Narendra Modi kaihhruaina hnuaiah India ramin hmasawnna nasa tak a nei zel a, ram pumpui leh mipui zawng zawng tana ṭhatna thlen tura sorkarin hna a thawh chhunzawm zel theih nan ṭawngṭaina hi a pawimawh hle a. BJP Mizoram chuan Mizoram mipuite pawh India ram hruaitute tana tawngtaisakna nei turin kan sawm che u a, Pathian hian kan ṭhatna turin engkimin min thawksak ṭhin tih ring chung a, kan ram hruaitu te tan a ṭawngṭaisakna nei ṭheuh turin kan sawm che u a ni, an thuchhuah-ah chuan an ti bawk.
