Home atanga tlan chhuak ten lirthei leh pawisa an ru chhuak, police ten an zawng mek
Thawhtanni kalta zan dar 12:30 vel khan Aizawl Observation Home, Durtlang North atangin mi paruk an tlan chhuak a, tlan chhuakte hian lirthei, pawisa leh mobile phone bakah anmahni kaihhnawih case file te an ru chhuak.
Bawngkawn Police Station atanga thu dawn danin, tlanchhuak mi parukte hian Observation Home atang hian Eeco Van MZ-01 Z 0778, Realme C61 mobile phone leh pawisa fai Rs 1,50,000 vel an ru chhuak a. Heng bakah hian anmahni thubuai ziahna 'Case File' an ru chhuak tel bawk a. Tlan chhuakte zingah hian May ni 26-a Chanmari Veng, Grand Hotel bula mi sawisak rawntu kum tling lo (juvenile) te pawh an tel nia hriat a ni a. He thu buatsaih lai thleng hian heng mi paruk leh an thil rukte hi man an la ni lo a, Guwahati an thleng tawh nia hriat a ni a, zawn zui mek an ni. Oberservation Home hi Mizoram Child Protection Society enkawl a ni.
