Sorkar-a buhfai supply dan diklo chhuifiah a, thil ti diklotute hrem an nih theih nan. Lokayukta ah complain thehlut dawn. MPCC Vigilance Cell
Vawiin khan MPCC Vigilance Cell chuan thuchhuah siamin, Mizoram sorkar in buhfai supply tura tender chhang hniam zawk thlang lova, a chhang sang zawk LZ Juice te a thlan danah hian thil fel tawklo tam tak a awm ngei ni a an hriat avangin ngun takin an chhui a. An rinhlelh ang ngeiin, LZ Juice ten Mizoram mipuite buhfai eitur an supply danah thil fello tam tak an hmuchhuak tih an sawi.
Congress thuchhuah chuan, ZPM an sorkar tirh phat atanga Mizoram mipuite eitur buhfai sorkarin a supply tir danah titi a tam nghal hle niin an sawi a. Food, Civil Supplies & Consumer Affairs Department chuan buhfai supply tur a thlan danah thil fel tawklo awm in, Buhfai Grade ‘A’ supply tura tender chhang hniam ber RL Store, Kulikawn, Aizawl chu thlang lo in, a aia Quintal khat Rs. 149 zela chhang to zawk LZ Juice chu Grade ‘A’ buhfai supply tura thlan a ni, an ti.
Tin, LZ Juice in buhfai a supply tur zat chungchang RTI hmanga mi pahnihin zawhna an zawh pawh chhanna inanglo pek niin. Zawhna zawttu pakhat hnenah LZ Juice in kum 2024-2025 chhungin buhfai Quintal 180000 supply anga chhanna pek a ni a, zawhna zawttu dang hnenah erawh Quintal 200000 supply tir angin chhanna pek a ni thung. Buhfai supply zat chungchanga Food, Civil Supplies & Consumer Affairs Department in chhanna chi hnih a nei tlat mai hi a mak hle mai a. Khawi hi nge dik zawk tih hi kan zawhna a ni, an ti.
Mizoram sorkarin sum a in daih loh em em laia a man to zawk fe a sorkarin LZ Juice buhfai a supply tir hi a mak hle a. Duhsak bik leh tum lawk sa avanga LZ Juice hi buhfai supply tura thlan a niah kan ngai a. Vawiin-a Zoram mipuite hriat tura chanchinbu mite hmaa kan sawi hi Food, Civil Supplies & Consumer Affairs Department-a RTI Act hmanga kan dil min chhanna min chhana atanga kan hmuhchhuah a ni, an ti bawk.
Congress Party chuan, LZ Juice ten buhfai an supply dan kan chhui zuina atangin LZ Juice hian Grade ‘A’ buhfai supply tura tender chhang siin Grade ‘A’ buhfai supply lo in, Common Rice (C-Rice) buhfai zawk an supply ngei tih finfiah a ni, a ti a. LZ Juice ten an buhfai supply tur an leina Suhanna Enterprise, Assam hnen atangin Grade ‘A’ buhfai ni lo in buhfai man tlawm Common Rice (C-Rice) ngei an lei thu finfiah a ni a. Mizoram Sorkar-in Buhfai Grade ‘A’ a nih leh nih loh thu finfiahna nei lo in C-Rice chu Grade ‘A’ angin an supply ta mai a. Hei hi mipuite zahlohna lian tak a ni. Grade ‘A’ buhfai supply tura thlan ni si a buhfai man tlawm zawk leh chhe zawk Common Rice (C-Rice) an supply zawk avang hian LZ Juice te hian hlawkna nasa tak an dawn belh ngei dawn a. Tender chhang hniam ber a ni lo chung a duhsak taka Grade ‘A’ aia Common Rice buhfai supply tirtu Supply Minister zahawm tak hian LZ Juice hnen atang hian hlawkna a tel ve ngei ang tih rin loh rual a ni lo, an ti bawk.
Congress party thuchhuah chuan, LZ Juice ten Common Rice buhfai an supply dan kalphungah hian thil mak tak tak a tam hle a. Mizoram pawn lam atanga buhfai an phurh luh danah hian Mizoram chanchin a thil thleng ngailo thil mak tak tak a awm nual mai a. LZ Juice ten phai lam atanga Muanna Godown Zuangtui a buhfai an phurh luh dan mak tak tak thenkhat an tarlang bawk a. Tin, Truck lian pui pui ten phai atanga buhfai bag tlem te te phur anga challan an siam vak mai pawh dawhkan atanga supply order mil tura challan siamremna mai mai ah kan ngai nghet tlat bawk. Zoram mipuite buhfai eitur atan a Grade ‘A’ buhfai supply tura thlan LZ Juice ten buhfai chhe zawk Common Rice an supply daih mai hi ZPM sorkarin Zoram mipui zahlohna ah kan ngai a. ZPM sorkar hnuaia buhfai supply dan diklo tak hi chhuifiah a, thil ti diklotute hrem an nih ngei theih nan MPCC Vigilance Cell chuan Lokayukta ah complain kan thehlut dawn a ni, an ti bawk.
