ZPM Sorkar-a CM leh Minister thenkhat te eiruk case awrh chhoh mek. MNYF Mobile Campaign
Nimin leh Vawiin Ni 16.4.2026 hian MNF Thalaite chuan, Aizawl khawpui veng hrang hrangah Mobile Campaign an nei a. Hmun hrang hranga an campaign naah hian, MPF Local Forum kaihhruaina hnuaiah thusawi tura ruat ten thu an sawi a ni.
MNF Thalai thuchhuah tarlan danin, thusawitu hrang hrangte hian ZPM Sorkarin SASCI sum sanction sa leh Work order pek vek tawhna Rs. 11152 lakh a tih Lapse dan leh kum 2025-26 atana Rs 32800 lakh SASCI Part-I Additional hnuaia allocate sa lapse vek te, Kum liam ta tho 2025-26 a AMC sum hman tur Rs. 1400 lakh ZPM sorkarin a tih lapse vek dan te, Lunglei Municipal Council sum Rs. 1800 lakh a tih lapse dante hmun hrang hrangah thu sawitu ten an aupui a. ZPM chu AMC a rorel tlak an ni lo an ti.
He Campaign-ah hian ZPM Sorkara CM leh Minister thenkhat te eiruk case awrh chhoh mek entirnan Lengpui ram dan lova hralh leh man tang tam tham tak taka ei ve an awm a rinawm dan te, Supply deptt a buhfai supplier tu turah duhsak leh hleihnei taka LZ Juice thlan an nih dan te, an supply hnathawh naah Supply Minister nen tiho a Car, Bike leh JCB te hmang buhfai phurhna bill lem siam vak vak te chu eirukna tenawm, chhui chian ngei chi a ni, an ti. MNF Thalai Mobile Campaign ah hian ZPM Chief Minister chu dawt sawi nasa hleah an puh bawk.
He Campaign hmun hrang hrangah hian CM Lalduhoma’n State Capital Aizawl atanga Thenzawla sawn tura ziaka Prime Minister sum a dilna a DO Letter copy leh sum an rawn pekna-ah pawh, Aizawl atanga Thenzawla State Capital sawn nana sum an rawn pek hriattirna copy te sem a ni bawk.
Media te zawhna chhangin MNF Thalai President Robert Romawia Royte MLA chuan “Aizawl dah hniam tumtu leh AMC hnathawhna tur sum ti lapse tu, Corruption lian tak tak in a bawm mek ZPM hotute hi mipuiin an hrechiang tulh tulh a, an rinna pawh a tlahniam chak hle a. MNF Party in AMC Candidates kan nei thaber a, Pathian leh Aizawl mipuite zarah MNF in AMC ah sorkarna kan siam ngei kan beisei” a ti.
