Mipui hnena kan intiamna-ah hian kan la rinawm reng. P&E Minister.
Buhfai phurh danah vawiin thlengin eirukna kan la hmu lo. Supply Minister
Vawin khan ZPM Ṭhalai General Headquarters chuan thuchhuah siamin, Aizawl Municipal Corporation inthlan tur atan hmun hrang hrang Luangmual, Chhangurkawn, Zotlang, Armed Veng South leh Saron Veng-ah te Street Campaign an neih thu an sawi.
ZPM Thalai Street Campaign-ah hian EF&CC Minister Lalthansanga (Chatea) chuan thu sawiin, ZPM ten kan Policy kan ngaipawimawh thin a, kan sorkar tuk atangin kan policy hi kan bawhzui nghal a, kan theihtawp kan chhuah avang hian Pathian pawn mal min sawm a ni, a ti a. AMC Election lo awm turah pawh hian mahni Policy hrechiang a hma latu tur ZPM, AMC a pian ngei theih nan Bial tina ZPM, AMC Candidate-te vote vek turin a sawm bawk.
P&E Minister F. Rodingliana pawh in thu sawiin, Kalphungthar Mipui Sorkar-ah hian kan chian a ngai a, Mipuite tan a rorel kan ni a. Pathian in min hunna hi kan hriatchian a ngai a, keini chuan mipui hnena kan tiam ang ngeiin Electric bill hi kan sorkar hnu hian kan la tisang lo a. Mipui hnena kan intiamna ah hian kan la rinawm reng a ni tih ka sawi duh a ni,a ti bawk.
Supply Minister B.Lalchhanzova pawh in thu sawiin, Buhfai phurh danah Supply Minister hian a eiru teuh a niang te min han ti a. Muanna veng saw buhfai rawn thlenkhawmna a ni a. Mi 1 in quintal 100 a rawn thlen dawn ta a, quintal 100 a rawn thlen loh chuan bill a siam theilo a. Amaherawh chu eirukna hi lo awm tak tak ta se, quintal 100 rawn thlen silo quintal 80 rawn thlentu kha quintal 100 rawn thlen angin receipt lo pe se, chutiang chu eirukna a ni. Amaherawh chu, chutiang chu vawiin ni thleng hian kan la hmu lo a ni, a ti.
PHE Minister Prof Lalnilawma pawh in thu sawiin, Aizawl khawpui tui hnianghnar taka kan neih theih nan AMRUT hnuaiah hmalak mek a ni a, kan hmalakna te hi tun term chhunga tih hlawhtlin ngei kan tum bawk a ni. Kan hma AMC Election lo awm turah hian ZPM AMC Candidate te hi lo vote vek u la, Aizawl tha zawk leh Free Corruption City siam i tum ang u, a ti bawk.
