ZPM Sorkar in mipui tam zawk MUHCS a inziak lut tura a duh tak2 chuan, Enrollment Fee a ti hniam mai tur niin kan ngai. Dr. Lallianchhunga MPCC Spokesperson.
Vawiin Ni 16.4.2026 khan Congress Party chuan thuchhuah siamin, MPCC Spokesperson Dr. Lallianchhunga chuan, MUHCS hi a hmang tangkai tawhtu damlo te kan hmaizah avangin Congress party chuan a pawng a takin sawisel kan hreh hle a. Heti chung hian MUHCS enkawltu official ten theihtawp an chhuah laiin, ZPM sorkar hotu lian te hian a nihna bak baka an fak thin erawh tha kan ti lova. Chuvangin, MUHCS hi uluk takin kan zir chiang a, hetiang hi kan hmuh dan a ni, a ti.
1. MUHCS a inziah luhna man hi a tam tham em avangin sorkar atanga hlawh la lo, mipui nawlpui tam zawkin an chhawr pha loah kan ngai a. Congress hunlai khan Mizoram State Health Care Scheme (MSHCS) a inziak lut kha chhungkaw nuai khat chuang te an ni thin a, tunah erawh mipui nawlpui (Contributory Beneficiary) MUHCS a inziak lut an tlem ta hle.
1. General (Gen. Ward) – Rs.2500 – 17,715 (Enrollment ti zat) – 16,498 (MUHCS hmangtu zat)
2. Standard (Semi Cabin) – Rs.5000 – 1604 (Enrollment ti zat) – 656 (MUHCS hmangtu zat)
3. Private (Pvt Cabin) – Rs.10,000 – 894 (Enrollment ti zat) – 400 (MUHCS hmangtu zat)
Source: RTI (Annexure-I)
Kumin, 2026 hian ZPM sorkarin tan han la thar viau mahse, Enrollment Fee a to em avangin April 14 thleng khan mi 29,472 (sing hnih, sangkua, zali, sawm sarih leh pahnih) an inziak lut tawh a, a hma kum aiin mi 9000 chuangin an tam tawh zawk a. Heti chung hian sorkar kal tawh te hunlaia inziahluh tlem ber lai pawh an la pha chuang lo a ni. (Annexure-II)
Congress hunlai khan mipuite ban phakin, enrollment fee pawh sang lo takin Health Care Scheme kan kalpui avangin chhungkaw nuai chuang inziak lut an awm thin a. MNF sorkar khan enrollment fee a rawn tihsan hret hret hnuah kum 2022-2023 chhunga inziak lut kha nasa takin a tla hniam ta a; a hma kum (2021 Oct -2022 March) a inziak lut zat 87,695 (sing riat, sang sarih, zaruk, sawmkua leh panga) chu 2022-2023 ah chuan 39,505 (sing thum, sangkua, zanga leh panga) ah a tla hniam a ni. Hei hian Health Care Scheme a Enrollment Fee tihsan hi mipuiin kan zo lo tih a lantir chiang hle a ni. (Annexure-III)
MUHCS a inziah luhna man a tam em avangin Kohhran hrang hrang te an member te tanpui tura an pen chhuah angai ta hi ZPM sorkar tan a zahthlak zawk hleah kan ngai a. ZPM sorkar hian mipui tam zawk hi inziak lut tura a duh tak tak chuan mipui nawlpui ban phakin Enrollment Fee a ti hniam mai tur niin kan ngai a. Mizoram sorkar atanga hlawh la ve lo chhungkua zawng zawngin MUHCS hi chhawr thei se tih hi Congress party chuan a duh ber a ni.
MUHCS hi sumdawng rilru pu lova kalpui turin ZPM sorkar kan ngen a. Mipuite tan hamthatna scheme (Welfare Scheme) a nihna ang taka kalpui turin ZPM sorkar kan beisei bawk. Mizorama Pvt Hospital tha kan neih te pawhin MUHCS an la zawm theih loh avangin damlo tam takin an tuar mek a ni. Heng harsatna hi chingfel a, huapzo tak leh sumdawng rilru pu loa MUHCS hi kalpui turin ZPM sorkar kan ngen a ni. ( A Full naktuk chhuak Chanchinbu lamah)
