AMC Sports Complex enhona-a ZMP Thalai te lo tel lo kha a mak. SASCI sum lapse dan enho la beisei tho. RRR-a
Vawiin ni 13.4.2026 (Thawhtan) khan MNF Thalai chuan thuchhuah siamin, a hma daih atanga ZPM Thalaite rawt anga MNF Thalaite nena ni 13.4.2026 (Thawhtan) zing dar 7:00-a Bawngkawn AMC Sports Complex enhona chu neih a ni a. ZPM Thalaite an lo tel loh avangin, MNF Thalaite, Bawngkawn GSA te, Bawngkawn YMA leh Bawngkawn LC hlui thenkhat te nen an enho a. Media mi tel ve te nen Inkawmna hun an hmang niin an sawi.
MNF Thalai thuchhuah chuan, media te zawhna chhangin MNYF President leh MLA nibawk Robert Romawia Royte chuan, ZPM Thalai ten he hna hi enho puiah ni 6 April 2026 daih tawh khan min sawm a. An sawmna-ah chuan a hun ruatfela anmahni hriattir leh turin min ti a. Kei chuan atuk ni 7.4.2026-ah ziakin enho ni atan ni 13.4.2026 Zing dar 7:00 AM ka ruat a. ZPM Thalaite pawh hi ziakin ka hrilh thlap a. Ni 10, April 2026 a Press Release an siamah pawh an pawm ngei a. Mahse beiseiloh takin ni 11 April 2026-ah lehkha rawn ziakin a ni ngai tho dar 2:00 PM ni se an ti ta daih a. Kan lo laklawh thui tawh avangin ni 13.4.2026 zing dar 7:00 a tih tlang tur a nih thu ni 12 April khan ziakin ZPM Thlai President ka hrilh leh bawk a, chutichunga ZPM Thalai 3 chauh an lo lang chu mak a tih thu a sawi.
Bawngkawna AMC field leh a bul kawngpui siam te, Pavillion leh Tanky tui Litre 400,000 leng siam te, Field tihzauh, drainage systems, Galleries siam te, Field fencing siam bakah PCC Road siamte hi a hun laia AMC Engineer te bakah Bawngkawn LC te,GSA te leh Welfare te enpuinaa thawh a ni a. An sawi danin Kum 2021 chho vel atanga thawh niin Bill pawh pek vek tawh a ni a. Contractor ten an thawh that avangin dan angin Security Deposit pawh pek chhuah leh vek tawh a. Roberta chuan AMC Sports Complex chu AMC hmalakna in Aizawla Field tha ber te zinga chhiar tel turin Phullem leh Flood light siam tum a ni, a ti bawk.
Tukin a telve AMC Dy Mayor kalchhuak R.Thanglura pawhin thu sawiin, sum eiruk emaw a hna thawh tur thawh kimloh emaw engmah a awmlo a, tilang kim duh silova Cyclone Remal tihchhiat laite kawk a video viral te kha thutak laka lak chi a nilo a ti a. AMC Corporator Lalringliana pawhin AMC leh Bawngkawn khawtlangten AMC Sports Complex enkawlho tura Agreement an siam dan leh hnathawh lai pawha an enho fo dante, a hna in thenawmte fak pawh a hlawh ve a ni tiin thil hriat fuhloh vanga Bawngkawn veng tana hriat nuamlo thil ri fo chu pawi a tih thu a sawi bawk.
