MNF & ZPM te hi BJP puan inzarzawm chung hian Krista tana lakkhawm puitu an nih i ring em? MPCC President
MPCC President Lal Thanzara chuan Dampa, Hachhek leh Mamit MLA bial khaw hrang hrang te a tlawhkual a, Kawrtethawveng-a thu a sawi naah MPCC President chuan, "MNF leh ZPM te hi Kristian nuaichimiha chanchintha dodal a, India danpuia sakhaw zalenna paih duhtute nena inpuan zarin an awm a ni. BJP puan inzarzawm chung hian Krista tana lakkhawm puitu an nih i ring em? India rama kristian te nuaichimih duh, missionary te harsatna thlentu BJP te nena puan inzarzawm tlat hi a thiang thei lo a ni" a ti.
MPCC President chuan, Ni 100 inhlawhna te pawh thingtlang mite tan a nia, tunah chuan BJP in pawngsualin ni 120 inhlawhna tur buatsaih dawn te tiin VB-G RAM G tia an vai Pathian lam tel ngei turin an che a, kan Kristianna pawlhdalna tura an chetlakna tih kan hriat a ngai. Pathianni kan serh namnulin Central hotu lawk ten Pathianni kherah Mizoram an rawn tlawh. Tun hnai lawkah pawh Central Minister a lokala kan CM chuan Lengpui airport-ah Hindu pathian betu dawngsawngin kohhran Upa ber inkhawm lovin a kal a ni, a ti.
BJP te hian foreign atanga tanpuina dawn dan te tidanglamin harsatna an siam nasa tak meuh meuh a ni. Ram dang atanga tanpuina dawnga kalpui Nau hnuchham in te, rualbanlo enkawlna leh kohhran school te harsatna an siamsak mek a. ZPM te hi an campaign laia an tiam zawng zawng anti lo fai vek, a letlingin an kal. Enchhin duhtu mipuite sorkar lakah an beidawng tawh, kan lo enchhin kan inchhir ti an tam em em a ni, a ti bawk.
MPCC President chuan, India leh kan State-ah Congress a sorkar leh a nih loh chuan ringtu, hnam hnufual leh tlang mite tan beisei a bo takzet a. Congress te hi sorkar tura kan inbuatsaih a ngai a, chuta tan chuan intlawhtawn te kan kalpui mek a. MLA pakhat chauh nei hi kan sorkar thei dawn em ni kan ti rilru a ni thei. MLA pakhat chauh nei hi 2028 ah chuan Pathian lung kan tihawi chuan min sorkar tir dan hi a thiam em em a ni tih chiang ang u, a ti.
MPCC President chuan, ZPM chhungkuaah Pu Sapa lam tang leh Pu Duha lam tang an awm hi thil chiang a ni tih sawiin, thil chiang a nih mai bakah, pawl pahnih te hi kum 2028 inthlan thleng khian thurualin an kal ang em ? Chutihlai chuan MLA pakhat chauh nei Congress hi Pathianin rorel turin min siam thei a ni, a ti bawk.
