June 15,2026(Thawhtan) YMA Day 91-na CYMA President Thuchah
Ruihhlo leh a zuartute do kawngah inthlahdah thei kan ni lo
YMA DAY VAWI 91-NA
Pathian hruaina in
Pathian hruaina in YMA Day Vawi 91 tluang takin kan lo thleng leh ta. Hmun hrang hrang a kan YMA Member puite he hun hi hlim taka hmang turin duhsakna ka hlan a che u.
YMA Day a lo thlen hian YMA in kan ram leh khawtlang tana rawng kan bawlnaah inpekna thuk zawk min neih tir se ka duh hle mai. Pu V. Thangzama'n YMA nihna, "Chanhai, riangvai te puitu, thlafam lusun te hnemtu, Kristian eng chu an lo chhi, duhaisam chu hei ngei hi" tia a lo sawi hi vawng nung zel ila. Chanhai, riangvaite puitu, thlafam lusun te hnemtu kan nihna hi kalsan lo ila, hei hi Kristian kan nihna anga Pathian rawng kan bawlna a ni.
Tun hnaiah YMA ten Pathian malsawmna kan dawng nasa hle mai. Kan neih theih loh tur lirthei tam tak kan Sub-Hqrs YMA leh Group YMA ten kan dawng a. Heng malsawm kan dawnte hi keini Central YMA hruaitute fel leh tlin vang niin lovin YMA kaltlanga ram rawng kan bawlnaah theihtawp kan chhuahzia hretute kaltlanga Pathian malsawmna kan dawn a ni. Heng kan thil neihte hi kan hmun theuhah mipuite rawngbawl nana kan hman tur a ni.
YMA Inkhawmpui Lian 2025-a Sakawrdai a neih chuan YMA Kumpuan atan "Ruihhlo Do" kan thlang a nih kha. Hemi bawhzui hian hma pawh nasa takin kan la, kan la zel ang. Ruihhlo do turin Central YMA level-ah Central Anti Drugs Squad (CADS) dinin anni hian mutmu pawh tuah mumal hman lo leh chawh pawh a hun taka ei thei lovin theihtawp chhuahin ruihhlo do hna hi an kalpui mek a ni. Hemi bakah Aizawl khawpui bik chu hmun 10 (Zone-10) ah inthenin hengah kan CEC leh Branch hruaitute hruaina in Zone Anti Drugs Squad (ZADS) ten tlaivarin ruihhlo do hna hi an thawk bawk a ni. Hetianga kan hmalaknaah hian ruihhlo pawh kan man tamin ruihhlo zuartute pawh kan um chep hle a ni. Hetiang bawk hian kan Sub-Hqrs. YMA, Group YMA leh Branch YMA te pawhin ruihhlo hi an do mek bawk a ni. Kan thalaite tibuaitu ruihhlo leh a zuartute do kawnga hma kan laknaah a lawmawm tak zet a, mahse inthlahdah thei kan ni lo a, in sangmar zel turin kan hruaitute ka sawm a ni.
Ruihhlo zuartute hi kan chhungkua, khawtlang leh ram hmelma an ni a. Heng mite hi a tawp rat thleng umzui ila, an lakah hian tlawm thei kan ni lo. Hnehna kan chan ngei theih nan theihtawp i chhuah zel ang u.
YMA KAN RAM TAN, YMA VUL ZEL RAWH SE.
R. Lalngheta
President, Central YMA
