Kawrthah VC ten National Panchayat Awards Ceremony 2026-ah lawmman an dawng. Lawmman hian Trophy leh Certificate bakah cheng vaibelchhe khat a keng tel bawk.
Aizawl the 5th June, 2026: Ministry of Panchayat Raj (MoPR) buatsaihin June Ni 3, 2026 (Nilaini) khan Scope Convention Centre, New Delhi-ah National Panchayat Awards Ceremony – 2026 programme hman a ni a. Mizoram atangin Kawrthah North Village Council chuan intihsiakna category pakhat Deen Dayal Upadhyay Panchayat Satat Vikas Puraskar hnuaiah lawmman an dawng.
India ram chhunga Panchayats/ Village Council te zinga India Ram Pum huap lawmman (National Panchayat Award) hmute chawimawina leh lawmpuina hun buatsaih ah hian Union Minister of Panchayati Raj, Pu Rajiv Ranjan Singh chuan category hrang hranga National Panchayat Award dawngte hnenah lawmman Trophy leh Certificate a hlan a. Minister of State for Panchayati Raj, Prof. S.P Singh Baghel chuan kalkhawmte hnenah lawmpuina leh fuihna thu a sawi bawk a ni.
Mizoram atanga Localization of Sustainable Development Goals (LSDG) Theme – 5 ‘Clean & Green Village’ category hnuaia Deen Dayal Upadhyay Panchayat Satat Vikas Puraskar (DDUPSVP) lawmman dawgtu Kawrthah North Village Council te pawhin Hon’ble Minister of Panchayati Raj, Pu Rajiv Ranjan Singh (Pu Lalan Singh tia hriat ni bawk) hnen atangin lawmman Trophy leh Certificate an dawng a. Lawmman pawisafai Rs. 1 crore (cheng vaibelchhe khat) chu Kawrthah North Village Council Bank Account-ah thunluh fel tawh a ni. Hei hi khaw hmasawnna hna thawh nan tangkai tak hman tura ruahman a ni.
Kawrthah North Village Council te hi Department Officials ten an tawimawm a. Kawrthah North Village Council ten LSDG Theme 5 ‘Clean & Green Village’ category hnuaia DDUPSVP lawmman pakhatna an dawng thei hi an khawtlang mipui ten sorkar hmalakna hrang hrang tha taka an thlawp vang leh theih tawp an chhuah vang a ni a, sorkar leh department chuan lawmman pakhatna an dawng thei hi a lawmpui takzet a ni.
