1st IR Battalion, Mualvum hnuaia SDRF ten intuaitharna an nei
Mualvum, 22nd June, 2026: Chhiatrupna (disaster) chi hrang hrang thleng thei laka chhanchhuah hna tha leh chak zawka kalpui a nih theih nan, vawiin khan 1st IR Battalion, Mualvum hnuaia State Disaster Response Force (SDRF) te chuan intuaitharna (Refresher Course) an nei.
He SDRF Refresher Course hi 1st IR Bn Commandant M.S. Dawngkima chuan a hmanpui a. Commandant chuan thu sawiin, chhiatrupna chu engtik hunah pawh thleng thei reng a nih avangin SDRF mi leh sate chuan an thiamna leh theihnate belhchhahin an intuaihriam reng a ngai a, chumi atana he hun pawh hi buatsaih a nih thu a sawi. Mipuiten puih an ngaih huna rang taka che chhuak thei reng tura inbuatsaih thin turin SDRF, 1st IR Bn te chu a chah bawk a ni.
Vawiin intuaitharna hunah hian SDRF te hi a thu (theory) leh a taka tih chhinna (practical) hmangin training neihpui an ni a, chhiatrupna thlen thulha hmalak dan tur hrang hrangte an zirho a ni.
