BJP duhtu an pung ve zel. Mizoram hian hlauh tur dik tak Pathian hlau ila, chumi hunah chuan dikna in ro a rel ang. BJP State Vice President
BJP Mizoram chuan vawiin July 10, 2026, (Zirtawp) khan BJP Mizoram State Office Mipui Rûn, Upper Republic-ah Friday Political Session neiin, State Vice President JB Rualchhinga chuan thu a sawi a. "CADC-ah BJP leh ZPM kaihhruai Sorkar chuan fiahna a paltlanga, Sorkar ngelnghet tak leh mipui tana chhenfakawm tak Sorkar a awm ngei a beisei awm ta a, CADC CEM thar hi Politician tawnhriat ngah tak, Nirupam Chakma a nih avangin CADC mipuite'n nasa taka hma an sawnpui ngei kan beisei a ni," a ti.
BJP State Vice President chuan, "Ram hmasawnna hi kan din chhan leh Politics-a kan awm chhan a ni a, Mizoram mipui pawhin BJP kalphung kan hre chho ve zel a, PM Schemes ṭha tak tak a bikin, PM-JAY (PM Health Insurance Scheme) bik ah Senior Citizen Kum 70 chunglam tana Healthcare a duan te hi a ropui hle a, Mizorama Kum 70 tling mi tupawh an inziak lut thei a, kum 70 tling chinte hei ringawt pawh hi ngaihven a ṭul hle a, ṭhalaite'n kan nu leh pa, kan pi leh pute tan ngaiven ngei turin kan chah che u a ni. PM Schemes ṭha tak tak Mizoramin kan hmelhriat lem loh leh ngaihsak vak loh te pawh a la tam hle a, chungte chu BJP Sorkarna kan neih hun ah nasa zawkin kan chaw lut dawn a ni," a ti.
BJP State Vice President chuan, "Tunlai hian BJP duhtu an pung ve zel a, BJP nihna dik tak hmu a BJP pawimawhna hria te'n BJP Office-ah lo lengin BJP chungchang an rawn zawtfiah ṭhin a, a lawmawm ṭhin hle a. Mizoram hian hlauh tur tak Pathian hlau ila, Pathian-in a ngaih pawimawhte ngai pawimawhin, a duh loh zawng te hnawl ngam ila, a thu awih kawng ah ṭhang lianin, chumi hun ah chuan Dikna in ro a rel ngei ang. Chuvangin, Kristian kan ni a kan danglamna hi ringlo mi ten hmuh zel an duh a, chu chuan ring takin thu a sawi ngei dawn a. Tin, BJP Mizorama awmte hi Kristian kan nih angin, India ram hmun hrang hranga awm kan unauten harsatna an tawh pawha an aiawha ding turte leh harsatna tawk te puitu tur a Palai hna thawk turte kan ni bawk a ni," a ti bawk.
Inkhawm ah hian Pu Johny Lalthanpuia, State Media Convener-in thu sawiin, Pu VL Awia State, Vice President, Election Incharge chuan Party mite hriattur By-Election chungchang sawina hun a nei bawk.
