Congress Party hi kan Kristianna nen a in hmeh lo hle. BJP State Vice President
BJP Mizoram chuan vawiin July 13, 2026 (Thawhtan) khan karthar Inhlanna leh Political Session an nei a, State Vice President Lalduhawma Pachuau chuan thu sawiin, "Nehru Forward Policy chungchang ah Kum 1961 ah khan, Ladhak leh Arunachal Pradesh India leh China ramri-a a hmalakna avangin, China chuan min bei thut a, India chu a tlawm zawk ah kan ṭang ta a, chuvangin Aksai Chin an tih chu India chuan kan chan phah a, Congress Party Politicy that loh kan tuar mek laia, Congress Party Leader Rahul Ghandhi a ten a BJP Sorkar beih nan a thubelh chian dawl lo an sawi ṭhin chu, thangthar te hian thudik kan hriat hi a ngai a, an mahni tih dik loh pawh midang puh duh zel an nih a vangin Congress Party hi chu kan Kristianna nen a in hmeh lo hle a ni," a ti.
BJP State Vice President chuan, "India rama BJP kaihhruai a awm lai leh a awm hnuin, Inches khat pawh hi India hian a ram a la hlauh lova, BJP kaihhruai Sorkar chuan India ram pum hi a hmangaih avangin, India-in a ṭhatpui tur a nih phawt chuan hlauh a nei ngai lova, India hian Nuclear Ralthuam a neih khan, ram dangin an hre miah lova, nimahsela Nuclear a nei a nih tih tifiah turin a test a ngai a, Nuclear a test chuan ram ṭhenkhat khan an hrêk dawn tih hre rengin huaisen takin a test a ni. Nimahsela India-in Nuclear Ralthuam a test khan Economy-ah harsatna awm thei zawng zawng laka in venna tur thlenga an buaipui lawk avangin harsatna lian tham kan tawk lova, Nuclear Ralthuam kan neih tak a vangin, kawng hrang hrangin India ram chuan hma a sawn phah ta zawk a ni," a ti bawk.
BJP State Vice President chuan, BJP chuan nasa takin India ram hmalam hun atan hma thlir thui tak neiin hma an la a, BJP inghahna bulpui ber, "Nation First, Party Second, Self Last" tih hi a ni a, chu chuan nasa takin Ram hmasawnna neihna kawngah min pui hle a ni. India ram Independent Kum 100 tlinna tur atana inbuatsaihna, Viksit Bharat 2047 ah, India ram chu khawvel ram hmasawn ber ni turin an buatsaih mek a, chu malsawmna pawh chu keini Mizoram pawh hian nasa takin kan dawng mek a, hun ṭha kan neih hi bawhpelh lova, Central Sorkar atanga Ram hmasawnna hnathawhna tur, Mizoram mipui tan kan seng luh theih nan Central Sorkar nen thawh hona ṭha kan mamawh hle a ni. Kan ram Politician-te hian keimahni Party bil aiin, Ram hmangaihna leh Ram hmasawnna tur dah hmasa ila, kan ram tan duh thlan tur dik kan hma a awm hi i thlang zel ang u," a ti bawk.
