2026 HSLC Exam zingah 80.31% an pass.
Mizoram Board of School Education (MBSE) chuan vawiin chhun dar 12:00 khan kum 2026-a High School Leaving Certificate (HSLC) Examination result a tichhuak a, kuminah hian naupang exam zawng zawng hi 18,257 an ni a, exam zingah hian 80.31% an pass a ni.
Mizoram Board of School Education (MBSE) Chairman JH Zoremthanga chuan kumin High School Leaving Certificate (HSLC) result chu nikum aiin a that zawk thu a puang a. Kumin hian zirlai hlawhtling te hi 80.31% an tling a, hei hi nikum lama mi 76.68% nen khaikhin chuan a san thu a sawi.
Chairman hian result dinhmun hrim hrimah hmasawnna hmuh tur a awm tih a tarlang a. Sorkar hmalakna thar angin kumin atang hian 'Top 10 Merit List' leh 'Distinction/Division' tarlan a ni tawh lo a, hei hi zirlaiten pressure an neih loh nan leh thiamna tak tak (quality-based learning) an neih theih nana ruahman a nih thu a sawi. Chairman chuan 'kuminah hian result hi top 10 kan tarlang lo a, hei hi CBSE leh CISCE leh board liah deuhte kalphung a ni. Hei hi NEP 2020 in kaihhruaina a siam credit system leh grading sysytem kalpui tur a hmalak lawkna a ni' a ti bawk.
HSLC Result hi MBSE official website: www.mbse.edu.in leh www.mbseonline.com ah te Roll Number leh Registration Number hmangin a en theih reng a. Office hun chhungin MBSE Office, Chaltlang leh Regional Office, Lunglei-ah te result hi a en theih bawk ang.
