Aizawl khawpui ah ngei hian BJP MLA te, AMC-ah ngei pawh BJP kaihhruaina kan hmuh vat ka beisei. Dr. K. Beichhua MLA
Vawiin khan BJP Mizoram chuan vawiin Friday Political Session an nei a, Dr. K. Beichhua, MLA & State President-in thu sawiin,
"AMC Election kan neih zawh taka Aizawl khawpuia huaisen taka BJP Candidate-te kan chhuang takzet che u a, Aizawl Khawpuiin BJP kan hmuh dan dik loh avangin nasa taka diriam leh beih kan tâwk ṭhin a, nimahsela vawiina kan dinhmun hi nakin lawkah chuan kan la ngai viau dawn a, Aizawl khawpui ah ngei hian BJP MLA te, AMC-ah ngei pawh BJP kaihhruaina kan hmuh vat ka beisei a ni," a ti.
Dr. K. Beichhua chuan, "Mizoram hian eng nge kan mamawh? kan tih chuan 'Development' hmasawnna hi a ni a. Chung hmasawnna kan neihna tur chuan kawng pawimawh tak tak a awm a, chhungte chu; Good Governance, Sorkar ṭha, Sorkar huaisen, mi rethei leh hausa thlei bik awm lohna leh rorelna dik kalpui te hi a ni a, hengte hi Pu Atal Bihari Vajpayee khan a theih ang tâwkin a lo kalpui tawh a ni," a ti bawk.
Pu Beichhua chuan sawi chhunzawmin, "Development thlen nana pawimawh dang leh chu, Transparency Sorkar hi a ni a, lang tlang taka sawrkar kaihhruai hi a ni. Development thlenna tura pawimawh Road Connectivity ṭha hi kan mamawh a, kawng hrang hranga inkalpawhna ṭha neih hi a pawimawh êm êm a ni. Chu inkalpawhna ngai pawimawh ber Party chu BJP-te hi kan ni a, Central blessing pawh Mizoram pawh hian kan changa, Four Lane/Double lane min pe a, Double Lane-in District khawpui hrang hrang min paltlang ta bawk a, hei bakah hian rêl a lo luh avangin nasa takin Mizoram chuan malsawmna kan dawng bawk a. Chuvangin, Development kan duh a, Development pe theitu BJP hi kan thawhpui a, BJP hlau lova, support kan pek hi a hun tawh takzet a ti.
Kei pawh Kristian MLA leh BJP State President ka ni a, ka rinna pakhat mah a hniam phah lo. Politics din chhan hi kan hriat a pawimawh hle a ni. Chuvangin, All Round Development hi khawi ah nge a awm? kan tih chuan a chhanna chu, BJP a nih avangin BJP Sorkar hi Mizoram hian kan mamawh hle a ni,"a ti bawk.
