AMC hmasawnna atana BJP Manifesto te hi belh chian a dawl. State Vice President
BJP Mizoram chuan Inrinni tuk khan AMC Election lo awm tur atana 'Street Campaign' ITI Veng kawn ah neiin, inkhawm hi Johny Lalthanpuia, State Media Convener-in a kaihruaia, Lalduhawma Pachuau, State Vice President leh K. Sanghluna, AMC Ward XVIII BJP Official Candidate te'n thusawina hun an nei bawk.
State Vice President Lalduhawma chuan thu sawiin, "AMC Ward XVIII enkawltu ni thei tura K. Sanghluna, BJP Mizoram State Secretary ni lai, BJP Candidate-a in nei hi in vannei hle a, AMC Ward XVIII Corporator atan in thlang tling a nih ngat chuan in Ward hi Model Ward ni turin BJP chuan kan siam thei dawn a ni," a ti a. "AMC hmasawnna atana BJP Manifesto-a kan hmuh te hi belh chian a dawl hle a, Ṭhalaite eizawnna atana puitu tur ṭha tak tak te hi Manifesto-a kan dah angin kan kalpui dawn a. Chuvangin AMC-ah hian Aizawl mipuite zarah kan lo tling a nih chuan AMC hmalakna ṭha zâwk leh changtlung zâwk kan nei ngei dawn a. Aizawl khawpui thianghlim leh fai tak kan neih theih nan hma kan la dawn a, tuihawk luan kawr tihfai leh a luan khawmna tur changtlung tak siam kan tum dawn a ni, a ti bawk.
Lalduhawma chuan, BJP-in Sakhuana ah min thliar loh zia lanna chu PRASHAD Scheme hi a ni a, he scheme kaltlang hian AMC huam chhungah sakhaw hmun pawimawh siam leh kan hnam rohlute tihchangtlunna lam hawiin project kan siam dawn a, chumi hmang chuan khualzin hîpna tur ṭha tak tak central sorkar puihna in kan buatsaih dawn a, heng bakah hian PM Schemes kaltlanga khawpui (Urban) hmasawnna hna thawh theihna tur ṭha tak tak a tam a, chhungte chu a nih dan tur ang taka hma lak vek kan tum bawk a ni" a ti bawk.
