AMC Playground, Bawngkawn West-ah sum fel lo nasa tak a awm. ZPM Thalai
Vawiin ni 12.03.2026 khan ZPM Thalai General Headquarters chuan Bawngkawn Brigade-a AMC Playground chu a hmunah an tlawh a, thil fel lo tam tak a awm ngeiin an hriat htu sawiin, Rs. 5,04,36,000/- hman ralna an hmuh loh bakah, MNF Party worker an duhsak zawng 18 hnen a, Aizawl țhalaite infiamna rotling tur an sem sawm chu an dem hle tih an sawi.
Hemi chungchang-a vawiin-a ZPM Thalai thuchhuah chuan, Vawiin March ni 12, 2026 (Thursday) a Assembly Budget Session kal meka Lunglei West bialtu T. Lalhlimpuia zawhna UD&PA Minister-in a chhannaah, Bawngkawn West-a Brigade Field, AMC Playground lo nita a sum senso zat hi Rs. 5,04,36,000/- niin, ZPM Thalai chuan a hmuna an tlawh tih an sawi a. Rs. 5 crore chuang hman ralna tur an hmu lova, RTI hmanga AMC a zawhna min chhannaah erawh, Contractor 16 leh sum senral Rs. 4,20,87,000/- niin, AMC in RTI hmanga chhana min pek hi a rinhlelh awm kan ti hle a ni, an ti bawk.
Vawiin-a Brigade field an tlawh naah hian Brigade field/AMC Playground hi a nih tur ang a nih loh zia an finfiah tih ZPM Thalai chuan an sawi a. March ni 21, 2022-a hawn tak, Lengpui MSSC Sports Complex-a Synthetic Astroturf Football ground, Rs. 500 lakh senga sak nen chuan tehkhin chi pawh a ni lo hial a, Lengpui khelmual siamna aiia Rs. 46,000/- a an seng tam zawk chunga Artificial Turf pawh phah loh, zim zawk bawk si, inkhelhna tlak lohva an chhuah hi ZPM Thalai chuan kan dem tak zet a ni, an ti bawk.
ZPM Thalai chuan, he khelmual hi a nihna angin tih puitling ni se, Mizo ṭhalaite, a bikin Aizawl ṭhalaite chhawr tur infiamna hmunhma pawimawh tak a ni a. MNF kaihhruai AMC-in political party worker inhlawhna mai maia an hmang leh, hna ṭha thawh aia mi 18 hnena an sem sawm hi Aizawl ṭhalaite hmuhsitnaah kan ngai a, ṭhalaite infiamna hmunhmaa inhlawh an lo ching hi MNF kaihhruai State sorkarah mai ni loin, MNF kaihhruai AMC-ah pawh a lo awm lehzel hi a vanduaithlak kan ti takzet a ni, an ti bawk.
