AMCECC chuan an hmalak a hlawhtlin hma chuan tawpsan an tum lo
Mizoram hmun hrang hrang-ah Sit-in demonstration an neih
All Mizoram CSS Employees Coordination Committee (AMCECC) chuan, sorkar-a an thil phutin awmzia a neih loh avang leh thu lawmawm engmah an la hriat loh avangin, sorkara an thil phut nawr chhunzawmnan nimin khan Sit-in demonstration an neih chhunzawm a, Aizawl District chuan Joint YMA Field, Vaivkawn-ah Sit-in demonstration hi an nei.
AMCCEC chuan, September ni 9 atanga ni 11 chhung khan, sorkar-a an lungawi lohna lan tir nan Mass Casual Leave an lo la tawh a, heng an lungawi lohna hrang hrang hi sorkar-a an representation thehluh a bo tak a vang te, CSS Employee ni lovin CSS Regularization Scheme an hmang te leh san lova lak tia zoram mipui hriata Chief Minister-in a auchhuahpui vang te niin an sawi. Sorkar-in CSS-ten sorkara regular-a an luh ve theihna tur CSS Regularization Scheme an siam sak chu a hmang tur ten an hman theih lohna turin, Office Memorandum an siam leh si chu tha an ti lo hle a, CSS te hamthatna tur siam sak ve siin an kawng an dan pin sak leh vek niin an sawi a ni.
Hemi chungchangah hian nawrh pawh an lo huaihawt tawh a, chutah chuan sorkar nen in bia in, inremna pawh neih a lo ni tawh a, scheme pawh a tul anga ennawn bakah Office Memorandum pawh siamthat an tum thu sorkar lam hian an lo sawi tawh a, chumi a hlawhtlin theihna tur chuan AMCCEC pawh sorkar-a Representation thehlut turin a ti a, an thurawn ang hian AMCECC chuan Representation pawh ni 19.5.2025 khan a lo thehlut tawh a, chu an Representation chu a thlenna tur thleng lovin a bo ta tih an sawi bawk.
Hei bakah hian, CSS Regularization Scheme chu CSS Employee te hman theih loh tura dan pin anih mek lain CSS Employee ni lo, Health Department hnuaia Health Worker, MR Skill - II tura lak a, hnua Provisional Employee-a leh ten an hmang daih chu hriatthiam har an ti a, heng ho aia senior zawk tam tak an awm lai leh chung senior zawk ten an hman theih loh laia, junior zawk leh CSS Employee pawh nilo ten an hmang chu thil dik ni thei ah ngai lovin, heng CSS Regularization Scheme hmanga Provisional Employee (PE) an dahnghehna Order hi sut leh turin an ngen a, senior zawkten an hman hma chuan junior zawkte hman hi an rem ti lo a ni.
CSS Employee-te Dan lova lak tia sawi chungchangah, CSS Employee-te hi dan ang thlapa lak an nih thu leh a hunlai ang zela scheme leh state sorkar hnuaia Competent Authority-te phal ang thlapa lak an nih thu an sawi a. CSS hnuaia ah hian committee pawimawh tak tak leh thuneihna sang tak nei an awm a, chung committee remtihna leh phalna thlapa lak vek chu an ni tih an sawi. Heng Committee ah hian Chief Minister Chairman na te, Chief Secretary Chairman na mai bakah Department Secretary enkawl committee pawimawh tak tak a awm a, chung committee hrang hrangten dan dik an tih ang thlapa lak an nih thu an sawi a ni. Heti chung chunga State Committee sangber-a Chairman nihna hial chelhtu berin, dan loa lak tia a sawi fo chu dik an ti lo a, dan loa lak an awm a nih chuan a latu committee leh member-te chhuichhuak a, dan anga hremna lekkawh turin an ngen bawk.
Nimin khan AMCCEC huaihawt Sit-in Demonstration hi Sub-Headquarter hrang hrang pawh hman niin, Aizawl ah chuan Joint YMA Field, Vaivakawn bakah Darlawn leh Sialsukah hman a ni a, Mamit District-ah chuan Mamit W. Phaileng leh Marpara ah te hman niin, Kolasib District-ah Kolasib leh Bukpui, Champhai District-ah Champhai leh Farkawn, Lawngtlai District-ah Lawngtlai, Chawngte, Bualpui NG, Sangau leh Lungpher, Lunglei District-ah Mizofed kawt, Venglai, Zobawk leh Tlabung, Siaha District-ah Saiha District Playground leh Saitual District-ah Saitual leh Phuaibuang ah te hman a ni a. AMCECC chuan an hmalak hi a hlawhtlin hma chuan tawpsan an tum lo a, an kal zel dan tur chu AMCECC in a rel chhunzawm zel dawn ani.
