AMCECC ten tiamchin awm loin chawl an la
All Mizoram CSS Employees Coordination Committee (AMCECC) chuan sorkar-a an thil phut nawr chhunzawm zelin Nimin atang khan tiamchin awm loin an chawl.
CSS hnuaia thawk intelkhawm All Mizoram CSS Employees Coordination Committee te hian, sorkar a an thil phut a hlawhtlin theih nan, kumin April ni 15 atanga ni 17 chhung khan pen down strike an lo nei tawh a. DP&AR Minister in theihtawp chhuaha bawhzui a tiam avangin April ni 19-ah khan sorkar nen inremna an siam a. May ni 19-a representation an thehluh chu August thla tawp lama an ngaihven leh a, an lehkha thehluh tawh chu a bo thu an dawng a, an chhui zelnaah file engmah a kal lo tih an hmuchhuak niin AMCECC hruaitu te chuan an sawi a. Inremna an siam hnuah sorkar in a ngaihtuah ve mai dawn emaw an tih laia, a ngaithah chu na an tih thu sawiin, September ni 3-a General body thukhawm chuan nawrh huaihawt hi an rel ta niin an sawi bawk.
Thawhlehni kalta khan AMCECC huaihawt in, Mizoram pum-a CSS hnathawkte hian lungawilohna lantir nan an awmna hmun theuhah Sit-in Demonstration an nei a. AMCECC hian Mizoram sorkar laka an thil phut hrang hrang chungchangah thu lawmawm hriat tur an la awm loh avangin, nimin Nilaini atang khan tiamchin awm loin an chawl a ni.
