Vawiin khan Planning & Programme Implementation Dept Committee Room-ah AH & Vety Minister C. Lalsawivunga chuan ranvulhtute tan Animal Insurance a tlangzarh. Hemi atan hian National Insurance Company Ltd. leh AH&Vety Department Secretary Lalsangliana ten Minister leh MSPCC Vice Chairman Dr. KC Lalmalsawmzauva hmaah thawhhona thuthlung an ziak.
He Animal Insurance hian ranvulh hrang hrang (vawk, bawng, sial, kel, berawm) a huap dawn a. Implementing agency atan National Insurance Company Ltd thlan an ni. Premium zaa sawmpanga (15%) hi ranvulhtu ten an tum ve tur a ni a. Handholding hnuaia progress partners te erawh chu handholding atanga tumsak vek an nih dawn a. Vawk vulh insurance atan cheng 2000 chawi tur kha cheng 292 chauh farmer (Bana Kaih Scheme progress partner ni lo) ten an tum a ngai dawn a ni.
AH&Vety Minister chuan, Insurance tlangzarh tak atan hian Central atangin Cheng Nua 66.49 hmuh a nih thu leh, hei hi first installment chauh niin, first instalment ah hian ran 4545 insured tum anih thu a sawi a. Sorkar chu ranvulhtute hmangaihtu anih thu leh ASF avanga tuar te tawrhpui nan ASF chu state specific disaster ah puan anih tawh thu te, ASF tuarte zangnadawmna compensation pek thin an nih thu te a sawi bawk.
Minister chuan Mizoram chu vawksa ah a intodelh dawna a lan mek laiin, kum 2021 atanga ASF leng chuan nasa takin vawkvulhtute a nuai thu leh, kha hrilen atang khan ngai an awh leh tawh loh thu te, ASF avanga vawkvulhtute sum hloh hi vaibelchhe zakua sawmruk (Rs 960 crore) a tlin tawh thu a sawi bawk.
