BJP hlauhawm loh zia hriai'n Ram, State leh Mimal hmasawn nan lo lut zel rawh u. State Vice President
BJP Mizoram chuan vawiin 22nd June, 2026 (Monday) hian BJP Mizoram State Office, Mipui Rûn, Upper Republic-ah Karthar Inhlanna leh Natural Farming chungchang zir hona hun neiin, inkhawm hi VL Awia, State Vice President-in a kaihruaia, JB Rualchhinga, State Vice President-in thu a sawi.
JB Rualchhinga chuan, "BJP Mizoram pawimawhna hretute chuan BJP State Office lamah BJP puihna an rawn dil ṭhin a, an harsatana lo ngaihthlaksaka theih anga lo puih ve hi BJP Mizoramin kan din chhan leh kan awm chhan a ni reng a, Mizoram leh Mizo hnam tana awm BJP-te hian Mizoram hmasawnna tur chuan tute pawh puih ngai an awm a nih chuan kan pui zel dawn a, BJP hlutna hi Mizoram mipuiin kan hre zel anga, nakin lawkah chuan State ah Sorkarna min la pe ngei dawn a ni," a ti.
BJP State Vice President chuan, "BJP kalphung hi a ṭha êm êm a, Mizorama Party dang ang lo takin, President term pawh awmze neia siam a ni a, Ṭhalaite hun a nih tawh angin kum naupang deuh te pawh State President-ah an awm a, National President meuh pawh Kum 50 la tling lo a ni a, hei hian a tih chian chu Ṭhalai Party chu BJP hi kan ni tih a tichiang hle a ni. Mizo Ṭhalai hnathawh tur mumal nei lo, eizawnna mamawh te chuan BJP tha ti chaka rawn zawm ve turin kan sawm che u a. BJP hlauhawm loh zia hriain Ram hmasawnna, State hmasawnna leh mimal hmasawnna kan neih nan BJP ah lo lut zel turin kan sawm che u a ni," a ti bawk.
Lalmalsawma, State Kisan Morcha President chuan Natural Faming chungchang sawiin, "Natural farming awmzia leh a bulpui ber chu damdawi leh bawl hlo (Chemical) tel lova huan thlai, buh leh bal enkawl hi a ni a. Hetianga lo neih danah hian kan leilunga, leilung ṭhatna awmsa ring chung leh thlai enkawlna tura keimahniin kan siam ve mai theih, lei tih ṭhatna leh rannung enkawlna hmanga huan leh thlai enkawl bakah, thlai chin pawlh leh thlai chi hrang hrang chin chhawk te, lei khuh hnawn leh bawng leh ran ek leh zun hman ṭangkai hi a pawimawh hle a. Chungte chu inkawp rem taka hman tangkai a nih chuan Natural farming kan tih chu a takin kan kalpui dawn tihna a ni," a ti.
