BJP Mizoram chuan May ni 6. 2026 (Zirtawp) tlai khan India Vice President Pu CP Radhakrishnan chu Lok Bhavan-ah hmu in, inkawmna hun ṭha tak an nei tih thuchhuah siamin an sawi.
BJP Mizoram thuchhuah tarlan dan chuan, BJP Mizoram State President Dr. K. Beichua leh BJP Mizoram State hruaitute chuan Vice President hnenah hian, Mizoram mamawh hrang hrang te sawipuiin, a bikin All India Institute of Medical Science (AIIMS) chungchang an sawipui a. Dr. K. Beichhua chuan kum 2018, 2023 MLA General Election-a BJP Mizoram-in Manifesto-a an dah tawh thu leh AIIMS damdawi in emaw a tlukpui an dil tawh thu a hrilh a. India Vice President chuan BJP Mizoram hruaitute thu thlen chu ṭha a tih thu leh AIIMS chungchang chu BJP Mizoram hruaitute'n palai tira Union Health Minister hnenah ziaka lehkha theh lut tur leh theihtâwp a chhuahpui a tum thu a lo hrilh bawk.
Vice President CP Radhakrishnan chuan India ram chu tun hmain Economy dinhmun hniam tak ah kan awm ṭhin a, nimahsela tun ah chuan World Economy ṭha tehna ah 4-na ni mekin, hun reilote-ah 3-na kan ni thuai dawn, a ti a. India ram hian nasa takin hma a sawn a, India rama cheng te ah hian Culture hrang hrang, Sakhaw hrang hrang bia te kan awm a, chung kan Culture leh Sakhuana te chu kan vawnhim a, kan inzahtawn sak a ṭul a, mahni sakhua leh hnam ziarang chawisan kawngah rinawm a ngai a ni, a ti bawk.
Vice President chuan Mizoram nuam a tih thu a sawi a, han hawi vela Pathian thil siam mawi tak tak hmuh tur awm te chuan nun a tih hahdam thu te a sawi a, hmasawnna hrang hrang luang lut mek te zingah Rêl hmanga inkalpawhna chuan Mizoram mipui tan malsawmna a thlen ngei a ring a, tin Viksit Bharat 2047 lo thleng tur ah Mizoram pawhin hmasawnna ṭha zawk kan neih zelna tur atan theihtâwp chhuah a, mi retheite tana Scheme ṭha tak tak te chu hre lo te hnena hrilh kawngah neitu nihna changa puangzar zel turin BJP Mizoram hruaitute chu a chah bawk a. BJP Mizoram chuan India Vice President lo zin hian Mizoram hmasawnna atan rah ṭha tak a chhuah ngei kan ring bawk a ni.
