Chakma khua-ah vote punna a sang, 2005 E-Roll-a khaw awm lo khaw 97 a awm. MZP
Vawiin June 23, 2026 (Thawhlehni) khan MZP chuan Aizawl Press Club-ah thuthar lakhawmtute kawmin, Mizoram-a Special Intensive Revision (SIR) neih meka SIR-in a base 2005 E-Roll leh roll thar ber E-Roll 2024 an khaikhin atangin, Chakma khaw bikah vote punna a sang lutuk nia sawiin, 2005 E-Roll-a khaw awm lo khaw 97 a awm thar niin an sawi bawk a, India leh Bangladesh-a vote nei kawp an hmuchhuak tih an sawi bawk.
MZP chuan Special Intensive Rivision felfai taka kalpui a nih theih nan foreigner pun chakna thin MLA bial a khua te an lo enfiah tawh tih an sawi a, Chakma khua bikah vote percent punna a sang bakah khaw 97 laiin a pun belh tih an sawi a, India leh Bangladesh khua leh tui nihna nei kawp an hmuchhuah bakah, E-Roll a House number awm lo pawh hmuh chhuah a nih thu an sawi bawk.
Hemi chungchang-ah hian Chief Electoral Officer hnenah complaint thehluh an tum thu sawiin MZP chuan, complaint an thehluh turah hian khaw 195 te chu SIR kalpui mekah en uluk leh zual turin a ngen dawn tih an sawi a. Khaw 195-ah hian SIR hi an kalpui tawh a ni pawhin, DEO te nen ngei ennawn leh turin MZP hian an ngen a, an hmalaknaah hian MZP chuan a tul anga theuneitute thawhpui an inhuam reng thu an sawi bawk.
