Champhai Excise ten nikum aiin kumin-ah zu leh ruihhlo an man tam tawh zawk.
Champhaia Excise & Narcotics Department-te chuan kum khat leh thla 9 chhungin zu leh ruihhlo kaihhnawihah thubuai 636 an ziaklut a, mi 556 an man tawh.
Champhai district Excise & Narcotics Department-te hian kum 2024 kum tluana ruihhlo kaihhnawih thubuai an ziahluh leh mihring an man zat aiin kumin thla 9 chhunga thubuai an ziahluh leh mi an man zat hi a tam tawh zawk.
Kum 2024 kum tluan leh kumin January atanga September thla thleng khan Champhai Excise duty-te chuan zu leh ruihhlo kaihhnawihah thubuai 636 an ziak luh tawh a, mihring 556 an man tawh bawk a. Kum 2024 chhung khan Champhai Excise-te hian ruihhlo kaihhnawihah mi 95 an man laiin kuminah thla 9 chhungin mi 112 an man tawh a, Narcotic Drugs & Psychotropic Substances Act, 1985 hmanga nikuma thubuai 71 an ziahluh laiin kuminah thubuai 87 an ziaklut tawh a ni.
Nikum chhung khan Champhai Excise & Narcotics Department hnathawkte hian zu kaihhnawihah thubuai 304 an ziak lut a, kuminah 174 ziahluh tawh niin, nikum khan mi 220 an man a, kuminah mi 129 an man tawh bawk.
Champhai Excise & narcotics duty-te hian nikum khan heroin kg 8 leh gram 783 leh meth kg 86 leh gram 835 an man a, kuminah hian January leh September thla inkar chhung khan heroin kg 12 leh gram 616 leh meth kg 87 leh gram 639 man tawhin, nikuma an man zat aiin kumin thla 9 chhunga heroin leh methamphetamine an man zat hi a tam tawh zawk bawk a ni.
Kumin hian Champhai Excise duty-te hian sap zu (IMFL) ûm puitling 1,012 an man tawh a, nikum khan ûm 733 manin, kumin thla 9 chhunga sap zu an man zat hi nikuma an man zat aiin ûm 279-in a tam tawh zawk a ni.
