Chief Minister Lalduhoma chuan, Criminal Law thar pathum leh Inter Operable Criminal Justice System tha taka kalpui a nih theih nan, Directorate of Prosecution din tur a chak taka hma lak a nih thu a sawi.
He thu hi vawiin-a Law & Judicial buatsaih Training for Government Advocates/Public Prosecutors & Nodal Officers of Court Cases, I&PR Auditorium-a buatsaih a hmanpui naah sawiin Chief Minister chuan, sorkar ukil te hi sorkar tana inhlawha court-a ding thin in ni satliah lo va, dikna vawnghimtu, mipui sorkara mipui aw, mipui leh sorkar chanvo vengtu leh haichhuah saktu in ni a. Court-a sorkar aw in nih avangin mi dik lote hmaa tlawm duh ngai lo nun hi nangmahni kaihruaitu ni ngei se ka duh hle a ni, a ti.
Chief Minister chuan, sorkar ukil kan ni emaw, private ukil kan ni emaw, ukil tha chu a achievement atanga teh a ni tih hretu vek kan ni a. Uluk takin kan thlir reng che u a ni tiim, mi tam tak chu thahnemngai takin in thawk tih kan hria a, heng mite chungah hian kan lawm thin hle a. Amaherawh chu, kan chak ngei ngeina tur nia kan ngaih case thenkhatah delay a awm vanga sorkar tanhmun a chhiat phahna a thleng zauh zauh thung a. He mi kawngah hian kan fimkhur a tul a. Law & Judicial department-in Office Memorandum on “Procedure for Handling Litigation and Matters Connected therewith” an tihchhuahah kha tha taka kan zawm tlan a ngai, a ti bawk.
Chief Minister chuan Nodal Officer-ten department tan legal matters-ah mawhphurtu pawimawh an ni tih an inhriat thar tha a tih thu sawiin, sorkar ukilte thlunzawmtu ber an ni a, thu haw lam leh kal lam vawngtu an ni a. Sorkar ukilte nena in inkarah communication tha tak neih a tul a. Case hmanhmawhthlak leh nghawng pawi zawk nei theiah te phei chuan lehkha hmanga indawr mai duh tawk lovin, phone tein sawi tlang ula, a tul phei chuan meeting-te neiin sawi ho thin ula a tha ka ti a. Communication tha lo leh case ngaihthah avanga sorkarin harsatna kan tawh ang chi hi chu thleng nawn tawh lo se kan duh, a ti bawk.
Chief Minister chuna Central Criminal Law thar pathum leh Inter operable Criminal Justice System (ICJS) tha taka kalpui a nih theih nan, Directorate of Prosecution din turin chak takin hma an lak mek thu sawiin, study group-te dinin an recommendation pawh sorkar-ah an rawn thehlut tawh a, Cabinet-a chhawpchhuah tura hmalak mek a nih thu a sawi bawk.
Law & Judicial Secretary T.L Guite pawhin thu sawiin, hetiang training hi tun hma khan neih thin a ni a, hun engemaw chen an chhunzawm thei ta lo va. Kuminah a bul an han tan thar leh ta a ni, a ti a. District hrang hrang atanga lo kal khawm sorkar ukil te leh Court case awmna department-a Nodal Officer te an tel a, chipchiar takin training an nei dawn a ni, a ti bawk.
************
