CM hovin Ginger USP Project chungchang sawiho
Aizawl the 25th May 2026: Vawiin khan Chief Minister Pu Lalduhoma hovin CM Conference Hall-ah Ginger USP Project kalpui dan tur sawihona neih a ni a. Pu PC Vanlalruata, Agriculture Minister, Pu F. Rodingliana, Industry Minister, Prof Lalnilawma, RD Minister, Pu TBC Lalvenchhunga leh Dr. KC Lalmalsawmzauva, Adviser to CM te leh official pawimawhte an tel.
Ginger USP Project hi department 5 velin thawkhoin (Convergence) an kalpui dawn a, Champhai Mualkawiah Sawhthing sawngbawlna pui ber dah a ni ang a, a process-na pui ber a thlen hmaa lo bunlawkna tur a process-na tenau pathum (spoke hub) Tualcheng, Zotlang leh Vaphaiah te dah a ni ang. Spoke Hub-ah hian sawhthingte chu tihfai a, hralh nghal chi leh hralh nghal mai chi loh thliar (grading) a ni ang a, a channa (slice) a awm bawk ang a, a tihrona a awm bawk ang. Chutianga tih theih loh chin, a oil siamnate, a branding te leh a dangte chu a hmunpui ber Mualkawiah thawh a ni ang.
Kumin chhungin a khawl bun fel hman tum a ni a. A khawlte hi sorkar enkawl lo va mimal investor/ entreprenuers / socuety te enkawltir tura duan a ni.
Vawiin meeting-ah hian he project kalpui dan tur indawt leh huntiam neia thawh ngai chi zawng zawngte chu chipchiar taka sawi a ni.
Kan lo tarlan tawh angin Ministry of DoNER chuan Mizoram sawhthing chu Unique Selling Proposition a pe a, chumi behchhan Project Mizoram Ginger Sustainable Cultivation & Value Chain Development, Rs.189.78 Crore senna tur siam niin, he project chhunga hmalakna pakhat Processing Unit dinna tur hi DoNER chuan NEC-ah Rs. 30.13 Crore a sanction tawh a. Sustainable Cultivation hi Ministry of Agriculture & Farmers Welfare te, Ministry of Rural Development te, Ministry of Food Processing Industry te, NABARD, ICAR leh IFAD te nena thawkhoa kalpui tur a ni.
Ginger USP Project, tuna kalpui tur hi a thawhkhatna a ni a. District dangah pawh kalpui zui zel theih beisei a ni.
