CM hovin Mizoram-a NHIDCL hnathawhte thlirhona neih a ni
Aizawl the 22nd June 2026: Vawiin khan Chief Minister Lalduhoma chuan CM Conference Hall-ah Dr. Krishan Kumar, MD, NHIDCL chu Mizorama NHIDCL hnathawh hrang hrangte thlirhona (Review) meeting a neihpui a, Chief Minister hi Vanlalhlana, PWD Minister, Lalthansanga, EF & CC Minister, TBC Lalvenchhunga, H. Ginzalal leh Dr. Lorrain Lalpekliana Chinzah, Advisers to CM te, official pawimawhten an tawiawm a. DC leh CALA ten online-in an zawm ve bawk.
An thu rel tlangpui :
1. Aizawl - Thenzawl Road National Highway-a siam tura DPR siamtu tur zawn mek a ni a. Tender hi tun thla tawpah hawn a ni ang. Dr. Krishan Kumar hian, Alignment hi kumina peih fel kan lo tum ang a, nakkumah sanction neih hman kan lo tum dawn nia, a ti.
2. Seling - Tipaimukh National Highway-a Tuirini lei leh Tuivai lei chu a rang lama siam that a tul thu Chief Minister hian a sawi a. Permanent Bridge siam tura hun eng emaw chen a mamawh rih dawn avangin, tuna bridge awmsa hi a ranglama thuam that phawt ni se, an ti.
3. NH 6, Vairengte - Sairang kawngpui repair and maintenance chungchang an sawi a. Khamrang to Sairang siam that hna hi an thawk zo tawh a, Kolasib lam section pawh an thawh zel thu an sawi. Nikum lama harsatna ang kha kuminah chuan a thleng lo tura ngaih a ni.
4. NH Tlabung - Kawrpuichhuah hi NHIDCL kuta dah tawh tur a ni a. Tihfel thuai ni se, an ti.
5. Four Lane National Highway Vairengte - Sairang/Aizawl hnathawh meka harsatna hrang hrang te, Aizawl - Tlabung NH thawh mek te an sawi a. Harsatnate chu a rang lama chinfel dan tur an sawi nghal a ni.
6. Thingfal khuaa Biak In chim leh School sawn ngaite sak thatna tur DC Lunglei-in proposal a thehluh chu Dr. Krishan Kumar hian a lo enchian tur thu Chief Minister hi a hrilh.
7. National Highway laih tharin a hèl, National Highway hlui lo ni ta hmun thenkhat NHIDCL lamin one time improvement an tih hnua state PWD hnena hlan tur chungchang an sawi a. NHIDCL lamin one time improvement a lo tih tawh te chu state sorkara hlan an ni ang a. A la tih loh te chu NHIDCL hian an thawk phawt ang a, state sorkarah a hlan ang.
8. Heng bakah hian hna an thawhna lama NHIDCL in harsatna an tawhte pawh an sawi a ni.
