CM hovin state chhunga hmasawnna hnathawh lian zual vil tura din te thukhawm.
Vawiin 18.3.2026 (Nilai) hian Chief Minister Lalduhoma hovin Mizoram Pro - Active Governance & Timely Implementation (Mi-PRAGATI) meeting vawi hnih na CM Conference Hall-ah neih a ni a. Member eng emaw zat a hmunah an thu a, member dangten video conference hmangin an zawm bawk.
Mi-PRAGATI hi state chhunga hmasawnna hnathawh lian zual te vil a, harsatna an tawhte chin fel dan dappuitu tur leh a tul anga department hrang hrang thawhhona tichak tura din a ni a. Mipuite tana rawngbawlna tam zawk, langtlang leh rang zawk kalpuina tur a ni.
Vawiin meetingah hian Aizawl Western side By-pass Road laih mek te, NHIDCL hmalakna te, PM SHRI Scheme hmalakna te, PMJVK hmalakna te leh Railways hmalaknate an thlirho a.
Aizawl Western side Bypass hna hi zaa 19. 56 thawh tawh a ni a. Kawngin paltlang rama khawsa raltlante sawn dan tur te, mimal quarry neituten zangnadawmna an phut chungchang te, kawng laihin a nghawng huan thlai chan te zangnadawmna te, forest clearance leh leivung paihna chungchanga harsatna awm mek te an sawi a ni.
Leivung paihna hmunhma an endikna leh rawtna an neih te chipchiar takin Er. Lalhriatpuia, Aizawl DC chuan a tarlang a. Hmalak zui dan tur pawh an sawiho nghal.
Vairengte - Aizawl inkar 4 lane hnathawh mekah meeting hmasaa sawi lan electric power line sawn chungchang chu chinfel a nih tawh thu tarlan a ni a. Harsatna dang an la tawh mekte sawiin a chinfel dan an sawiho a ni.
He 4 lane kawngpui laih mek hi 90.110 Kms a thui tur a ni a, heng zinga 60.295 Kms hi Greenfield Alignment tura duan a ni.
PM SHRI (Pradhan Mantri School for Rising India) Scheme kalpui mekah Mizorama sorkar school 35 te chu PM SHRI kalpuina atan thlan an ni a, thawh ruk (6 phase) a kalpui tur niin a thawhkhatnaah school 22 ah hmalak a ni.
PMJVK hnuaiah hian Mizoramah project 104 approved tawh a ni a, an zinga 84 chu thawh zawh tawh niin, thawh mek 18 a awm a. Sanction beisei mek a awm nual bawk.
Sairang - Thenzawl rel kawng survey chungchang sawiho a ni bawk a. Thenzawl thlenga rel line kalna tur hi chinfel thawkhat a nih tawh thu Railway thuneitute hian an tarlang a ni.
Meeting-ah hian PWD Minister, EF&CC Minister, Education Minister, Revenue Minister leh member te an tel a. Mi-PRAGATI hi nikum August thlaa din kha a ni a. Chief Secretary chu Member Secretary a ni a. Member te chu Principal Secretary, Secretary leh Deputy Commissioners te leh state chhunga central sorkar department / agency head te an ni.
