CM-in a hmalaknaah mawh la ngam rawh se. Rel station-a bazar nî siam tum hi a ṭha lo. MPCC President
Vawiin March 2, 2026 Thawhtanni khan Mizoram Pradesh Congress Committee chuan Political Session an nei a. MPCC President Lal Thanzara chuan thu sawiin, "Ni 23 Febuary 2026 (Thawhtan) a Chief Minister-in Assembly House-ah 'Sairang rel station-ah bazar nî siam tum a ni' tih a sawi hi ṭhalo hle in kan hria, a ti.
MPCC President chuan, "Bazar nî siam a nih chuan 'vai sumdawnna nî' kan siam dawn tihna a ni a. Mizoram pawisa luanralna nî a ni bawk ang, a ti a. Mizo chawhmeh lei turin vai an lokal khawm dawn lo va, chawhmeh leh bungrua, thawmhnaw zawrh tur an rawn keng lut ṭeuh dawn a. Sumdawnna min chimralna tur kawng pakhat a ni thei bawk a. Mizo sumdawngte tan a ṭha lo a, mahni thlai thar zuartute tan a ṭha lo bawk a. Sorkar hian ngaihtuah nawn se, Sairang Rel station a bazar nî siam hi ti lul suh se, a ti
MPCC President chuan, 'The Mizo Marriage and Inheritance of Property (Amendment) Bill, 2026' Mizoram Assembly House-ah ni 24 Febuary 2026 (Thawhleh) a passed taka Bill pu luttu Chief Minister in 'Mizo hmeichhiain hnamdang pasal an neih chuan Mizo an nihna a tawp nghal' tia a sawi hian Mizo mipui tam tak thinlung a tinâ a. Nasa taka social mediaah te dodalna a lan tak avanga ni hnih hnu lekah CM vekin 'Sorkar tih a nilo' ti a. NGO te pressure avanga bill pulut a nih thu a sawi ta daih hi mawhphurhna lak ngamloh vang a ni a. CM bill putluh, House a passed aia sorkar tih thil dang a awm thei lo. Chief Minister in a hmalaknaah hian midang dem tur zawng lovin mawh la ngam rawh se, a ti bawk.
MPCC President chuan, Hnam hi thisen avanga kan neih a ni a. India constitution in a tihdanglam theih a ni lo. Mizo Hmeichhiain mi tupawh pasalah neiin khawi hmunah pawh, state dang leh ram pawnah pawh awm se Mizo a ni reng ang. Mizo danah Mizo hmeichhiain pasalte hnam an ṭawm ngai lo, a ti bawk.
