CM in Aizawl Western Side Bypass road laih mek thlirpui
Nimin khan Chief Minister Lalduhoma office-ah, Aizawl Western Side Bypass road laih mek thlirpuina meeting neih a ni a. Contractor te hnathawh tawh chin leh hmachhawpte chipchiar takin a sawipui.
Aizawl Western Side Bypass road hi PM DeVINE sum Rs. 500 Cr. senga thawh tur niin, a thawk tur hian RG Buildwell Engineer Limited te thlan an ni a. Kawng hi kilometer 45 a thui niin tun thlengin Physical Progress hi 13.70% an nei tawh a. Kum 2028 kumtir lama zo hman tura beisei niin, contractor hian an thawh zawh atanga chhiara kum 5 chhung an enkawl zui dawn a. Leivung paihna hmun hi a vaiin hmun 23 vel neih a tul dawn a. A ruala a zavai tana dumping site proposal hi siam a harsat avangin, hna an thawhna hmasa tana an dumping site tur hmun sarih chu pawmsak tawh an ni a. Hna hi State Priority Project a ni.
