CM-in Case nei dept. te lo tang thar a, case nei lo tura inbuatsaih vek turin a ngen.
May 26.2026 Vawiin khan Vigilance Department ten Department hrang hranga disciplinary authority-te tan ATI Auditorium-ah Workshop for Disciplinary Authority a buatsaih a, Chief Minister Pu Lalduhoma chuan a hawnna inkhawm a telpui.
Thu sawiin Chief Minister chuan, sorkar hnathawktu tha, hun vawng dik, inpe zo neih kan duh a, sorkarna kan chan rualin chutiang hmalakna chu kan kalpui nghal a. Chhawrtlak lohte indapchhuak turin Service Review Committee din vek turin kan ti a, a tul phei chuan special pension pawh pek mai ni se kan ti a. A scheme pawh kan siam a ni. Chung zawng zawng chu ram tana hna tha zawk thawh kan duh vang a ni.
Vawiina Disciplinary Authority-te tana Workshop hi Mizorama hetiang workshop kan neih hmasak ber niin ka hria a. He workshop hian hnathawk tha lo leh chhawrtlak lohte chunga dan anga hmalak kawngah min tichak se, sorkar hnathawk tha zawk nei turin min pui se kan duh a ni. Disciplinary authority ten in mawhphurhnate, in hnathawh chhan leh in thawh dan turte hre chiang ula, hlawk takin hun lo hmang ang che u.
Enquiry Officer ten thudik chauh innghahchhanah hmang thin ila, thlei bik nei lovin, tehna dik tak chauh hmang ang u. Tin, Inquiry Officer ruat kawngah pawh kan fimkhur thin dawn nia. Sorkar chuan kan Inquiry Officer te, Presenting Officer te lawmman (honorarium) hi sorkar laipui rate angin kan tisang a. Hei hian an hnathawh kan ngaihhlutzia a tilang a ni.
Vigilance Department Quarterly Report hnuhnung ber, March 2026 -a a lan danin department thenkhatten Vigilance Case kan neih nual laiin Agriculture & Farmers Welfare, Animal Husbandry & Veterinary, Art and Culture, Environment and Forests, Law and Judicial, Tourism leh department dangten NIL report an nei a. An chungah lawmthu ka sawi a. Case nei department te pawh lo tang thar a, case nei lo tura inbuatsaih vek turin ka ngen che u a ni, a ti bawk.
