CM-in Mizoram Police Service Training mekte a kawm
Aizawl the 8th July 2026: Vawiin khan Chief Minister Lalduhoma chuan a office-ah Mizoram Police Service Officer, Administrative Training Institute-a training mek (MPS 26th Batch Trainee) mi pariatte a kawm.
Chief Minister hian MPS Training mekte chu thiamna sang tak tak nei an nih avangin an tangkai hle dawn tih a hrilh a. Zirna tluang pangaia in thiamna bakah hian Hindi tawng hi thiam tum ula, Information Technology lamah pawh lo hriam hle ula, in service kal zel tur tan leh kan ram tan a tangkai dawn a ni, a ti.
Chief Minister hian IPS a training lei leh a service lai chanchinte pawh hrilhin, kan mimal nunphung leh kan mizia hi kan awmna tur leh kan thawhsak tur mipuite ngaihven hmasak a ni zel a. Kawng engkimah mawi takin in nung zel dawn nia. Police hna hi harsatna tawkte tanpui hna a ni ber a. Mi hlimna leh hlawhtlinna chanchin aiin an manganna chanchin kan hre tam zawk thin. Chuvangin, rawngbawlna anga ngaia thawh chi hna pawimawh tak a ni, theihtawp in chhuah dawn nia tia chahin duhsakna a hlan a ni.
Trainee te hian an hriat duh thil hrang hrangte an zawt bawk a. MPS Trainee te hi Rita Lalnunmawii Pachuau, Director, ATI chuan a tawiawm a, inkawmna hun tha tak a pek avangin Chief Minister chungah hian lawmthu a sawi a ni.
