CM-in MSME te intuaihriamna tur project a hawng.
Vawiin 12.2.2026 khan I&PR Conference Hall-ah Chief Minister Lalduhoma chuan, Confederation of Indian Industry Centre for Excellence on Employment & Livelihood (CII CEL) leh Mizoram sorkar tangkawp buatsaih Micro & Small Entrepreneurs Excellence Project in Mizoram leh Mizoram Entrepreneurs Development Forum a hawng. Heng hmalakna pahnihte hi Mizorama MSME neitu, hmasawn zel tumte intuaihriam nana buatsaih a ni.
Chief Minister chuan, Mizote hi tunhma atanga thiam thil ngah tak hnam kan ni a. MSME lamah hmakhaw eng tak kan nei. Nikumah khan IndiaSkills Competition-ah Mizo thalai eng emaw zat ten lawmman an rawn dawng a, kuminah pawh Indiaskills NE Championship-ah Mizo thalaiten Overall Champion an rawn hawn leh a ni, a ti.
Kan ramin dehchhuah a neih a, hnathawh tur a lo pun theih nan heng kan thalai skill nei tha tak takte hi chawikan kan tum a. Kan entrepreneurs te hi an bana kaia dinchhuahtir kan duh a, kan flagship scheme Handholding hian an tan remchang a siamsak mek a.
Kan MSME neitute pawh hi skill nei tha, mahnia eizawnna bul lo tan a, tha taka lo kalpui tawhte an ni a. Tuna an dinhmun atanga sang lehzuala an lawn theih nan he Project hi kan buatsaih leh ta a ni, a ti.
Chief Minister-in a hawn projects pahnihte hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duhte tana buatsaih a ni a. Mithiam zawkte nena an mamawh sawihona (Forum) pawh siamsak an ni ang a. Kum khat chhung kalpui phawt tur niin, mi 70 te training tura thlan an ni.
