Vawiin Octrober ni 6, 2025 khan Chief Minister Lalduhoma hovin, Chief Minister Conference Hall-ah Special Assistance to States for Capital Investment (SASCI) hnuaia Department hrang hrang kaltlanga hmalakna kalpui dan thlirletna neih a ni.
Chief Minister chuan SASCI chu Department hrang hrang kaltlanga hmasawnna hna thawhna tur a nih angin, hmalaknate a hun taka zawh fel thin a nih theih nan ngaih pawimawh a tul thu a sawi a. Department thenkhata thawktute inthlahdahnain SASCI kaltlanga hna tha taka thawktu Department dangte a tih khawtlai phah theih avangin thawktute inthlahdah lo turin a chah a. SASCI hnuaia hnate tha taka thawhin a kum leh a ruahmanna kalpui dan tur nasa taka a hirl lawk thu Chief Minister chuan sawiin, department hotute chu a hun taka hna zo fel hman turin a chah a. A tul dan azirin Department hrang hranga thawktute pawh indawrtawn zung zung thin tur leh an hnuaia thawktute uluk taka vila enpui thin turin a chah bawk.
Finance Department buatsaih, Kum 2020 -2025 chhunga SASCI hnuaia project hrang hrang dinhmunte chu Finance Secretary Ramchuana'n Powerpoint Presentation hmangin a tarlang a. Kum 2024-25 chhunga Project kal lai, Expenditure Sanction la awm lo, PWD hnuaiah Project 3, Agriculture & Farmers Welfare Department hnuaiah Project 3, Disaster Management & Rehabilitation hnuaiah Project 2, UD&PA hnuaiah Project 1, Food Civil Supplies & Consumer Affairs, Tourism, Land Resources & Soil Conservation leh Irrigation & Water Resources Department hnuaia project 1 theuhte chu thlirlet a ni a. PWD hnuaia Working Women Hostel sak hna chak zawka bawhzui dan tur leh PM Ekta Mall (Unity Mall) sak hna sawt zawka kalpui dan turte sawi ho a ni bawk.
He meeting-ah hian Home Minister K. Sapdanga, PWD Minister Vanlalhlana, EF&CC Minister Lalthansanga, Agriculture & Farmers Welfare Minister PC Vanlalruata, Health & Family Welfare Minister Lalrinpuii, Power & Electricity Department Minister F. Rodingliana, Sports & Youth Services Minister Lalnghinglova Hmar leh Adviser to Chief Minister (Finance & Planning) TBC Lalvenchhunga te an tel a. SASCI hnuaia hmalakna kalpuitu Department Secretary, Director leh Official dangte an tel bawk.
