CM-in Territorial Army Batch hmasa ber Mizo thalai 144 te a vailiam.
11th May, 2026
Vawiin khan Chief Minister Lalduhoma'n Assembly Annexe Building Conference Hall-ah 166 Infantry Battalion Territorial Army (Home & Hearth) a thawk tur, Mizo thalai thlan chhuah hmasa ber mi 144, mipa 135 leh hmeichhia 9-te a vailiam. Tun thla ni 15-ah training turin Shillong an pan ang.
Chief Minister chuan, vawiin hi Mizoram tana ni lawmawm leh chhinchhiahtlak a ni. Territorial Army hi a awm tih pawh tunhmain ka lo la hre ngai lo va, kan hriat rualin central sorkar thuneitute hnenah Mizo Battalion min pe ve turin ka dil nghal a. A tirah mi 70 lak min phalsak a, a taka kan lak hmain kan dil belh leh a, mi 144 lak min phalsak ta a. Prime Minister Pu Narendra Modi, Union Home Minister Pu Amit Shah, Defence Minister Pu Rajnath Singh leh Chief of Army Staff General Upendra Dwivedi te chungah kan lawm hle.
A dang lak belhna tur hmalakna kan buaipui leh mek bawk a. Mizo thalai, a tam thei ang ber hi lut se, eizawnna a nih piah lamah ram venhimna hna a ni a, a zahawm a, nunkawng kaihruaitu tha a ni bawk si a. Thahnem kan ngai hle a ni.
Vawiina training tura kan vailiam tak kan thalai mi 144 te hi hmahruaitu, Mizo thalaite hmelhmang tilangtu tur in nih avangin theihtawp chhuah turin kan beisei che u a. In kalna apiangah zo nun ze mawi tak takte lantir zelin, kan ram leh hnam timawitu nih in tum tlat dawn nia, tiin a chah a ni.
Thla thar atang khian MTA-te chuan training an nei tan dawn a. Chu mi hmaa tihfel ngaite tifel turin tun thla laihawl hian Shillong an pan phawt ang a. Mipa 135 te hian Shillong-ah Training an nei zui ang a, hmeichhia 9 te hian Bangalore-ah training an kal thung ang.
