CM-in zirna siamṭha turin theihtawp an chhuah thu a sawi. All India Service a thalai te an lut theilo a vei.
Vawiin khan Mizo Students’ Union Silver Jubilee lawmna chu Dawrpui Multipurpose Center-ah hman a ni a, Chief Minister Lalduhoma leh Supply Minister B. Lalchhanzova ten an hmanpui.
Jubilee lawmna inkhawm hi MSU Vice President Roluahpuia'n a kaihruai a, Chief Minister Lalduhoma chuan thu sawiin, ZPM sorkar chuan kan ram zirna siamṭha tura theihtawp a chhuah thu a sawi a. An sorkar hnuah HSLC result pawh a kum tela a ṭhat telh telh thu sawiin, ZPM sorkar hruaitute chuan ṭhalaite hmalam hun an ngaihtuah thu a sawi a. Generation Gab siam pawh an tumloh thu a sawi a. Thalai te All India Service a an lut theilo chu a vei thu sawiin, Central Service-ah theihtawp chhuah tura a duh thu a sawi a. Hemi bakah SSC exam te pawh tihtakzeta bei uar turin a sawm bawk a ni.
Supply Minister B. Lalchhanzova pawhin thu sawiin, MSU hruaituah hian kum 2001 khan Committee member ah te alo awm ve tawh thu a sawi a. MSU thupui bul ṭan ṭhat chuan rah ṭha a chhuah tih chu mihring nun kalzel tur atana pawimawh tak a nih thu a sawi a. Kan lo tifuh tawh lo a, kan lo tisual tawh anih pawhin bulṭan ṭha leh a, beidawng ngailo turin MSU member te chu a chah a. Tin, Sorkar chuan tehna dik leh bukna dik hmang tura theihtawp a chhuah thu a sawi a. Hemi atan hian MSU te pawh thawhpuiah a sawm a. Gas buk tlinglo te, buhfai buk tlinglo te kan ram ata umbo zelna kawnga theihtawp chhuahpui turin MSU te a sawm bawk a ni.
MSU President B. Lalkhawngaihzuala pawhin thu sawiin, MSU hruaitu hluite chu vawiin pawl dinhmun hruai thlengtu annih avanga zah phu an nih thu a sawi a. Mizoram sorkarin Quality Education siam tum avanga HSLC leh HSSLC exam result bu a ranking a tibo chu lawmawm a tih thu a sawi bawk.
MSU Silver Jubilee-ah hian General Headquarters a Office Bearer lo ni tawh zawng zawngte hnenah chawimawina thuziak hlan a ni a. Hemi bakah hian Silver Jubilee puala zirlaite tana inelna buatsaih lawmman sem a ni bawk.
