Congress Party hi Mizoram mipuite hmelma an ni. BJP Mizoram
Vawiin khan BJP Mizoram chuan thuchhuah siamin, March ni 5, 2026 MZP-te'n Zoram Ni tia hun an lo hman ṭhinna ni kan lo thleng leh MZP te'n Mizoram History-a hun hreawm leh thim lai ber kan tawh hriatrengna atana, 'Zoram Ni' an phuah hi kan ṭawmpui a, Mizoram mipuite'n hetiang hun kan tawh lai kan theihnghilh mai loh nan leh hriatrengna 'Zoram Ni' an buatsaih hi BJP Mizoram chuan lawmawm kan ti hle a ni, an ti.
BJP Mizoram chuan, March ni 5, Kum 1966 Congress sorkar Indira Gandhi kaihhruaiin, a ram chhung mi, Mizoram nasa taka Jet Fighter hmanga a beih a, a nghaisakna leh Mizoram hmun hrang hrang ah bomb te thlak a, pawi sawi lo mi tam tak tawrhna te kha kan theihnghilh ngai dawn an ti a. Khatih hun laia Congress sorkar in Jet Fighter hmanga Bomb an thlak te pawh, ration kan thlak tia an sawi duh mai te kha, Mizo mipui zahlohna leh hmuhsitna tawp ah kan ngai a, khatiang khawpa ram dang bei ang mai a, a ram chhung mi te bei duh Congress Party hi Mizoram mipuite hmelma an ni tih hi BJP Mizoram chuan kan sawi duh a ni, an ti bawk.
BJP Mizoram chuan, hemi chungchanga India ram Prime Minister Narendra Modi-a'n Parliament House-ah meuh, Mizoram mipui thlavang a hauh chu lawmawm an tih thu an sawi a. Central-a sorkarna chelh tawhte ah Mizoram mipui thlavang hauh ngam awmchhun a ni bawk tiin, BJP Mizoram chuan kan Prime Minister Narendra Modi hnenah pawh lawmthu kan sawiin, tumah en hran leh thlei bik a neih lohna te chu Mizoram mipui te pawh a taka hmutu kan ni, an ti a. 'Zoram Ni' lo thleng hian kan hmalam hun atan pawh hmangaihtu dik kan hmuhna hmanrua lo niin, dawt hmanga Mizoram mipui thluak sûk sak ṭhintute chetna hi kan hriat reng a pawimawh hle tih hi BJP Mizoram chuan Mizoram mipuite kan hriattir duh a ni, an ti bawk.
