CYMA in Zone Anti-Drug Squad-a din belh.
YMA kumpuan 'Ruihhlo Do' bawhzuina kal zelah Central YMA chuan Zone Anti-Drug Squad (ZADS) a din belh a. Aizawl khawpui chhungah beihpui an thlak tan.
Central YMA kaihhruaiin nizan 23.2.2026 khan Dawrpui Multipurpose Hall-ah Aizawl khawpui chhunga Branch YMA 111 kalkhawmin an rel angin, Aizawl khawpui chhunga Branch hrang hrangte chu Zone 10-ah inthenin, Zone tinah Anti- Drugs Squad (ZADS) din a ni.
ZADC puipate inruatin an huamchhunga Branch tin atangin ZADS member tur 3 theuh ruat leh a ni a. Zone tin hian Duty Post siamin February ni 20, 2026 atang khan ruihhlo do beihpui hi an tan a ni.
Zone hrang hrang Duty Post te hi ni February ni 21-23 zan khan Central YMA hruaituten tlawh kualin bul tan nan Rs.10,000/- theuh an hlan a, ZADS hruaitute leh member-te infuihna hun an hmang nghal a. Central YMA hian a tul angin Zone tinte mamawh leh harsatnate a enpui zel dawn a ni.
Zone Anti-Drugs Squad te hi Central YMA hnuaia Central Anti- Drugs Squad (CADS) te nen inpuibawm tawnin an thawkho dawn a, Central YMA hruaitu ten an vil bawk ang.
