Duhthusam pha vek lo mahse an hruaitute inpekna avangin Val Upate an lawm. VUC PR
March ni 9.3.2026 ( Thawhtan) khan ZPM Val Upa Council chuan thuchhuah siamin, ZPM Party a lo pianchhuah hnu reilote atang khan Party leh ZPM Sorkar uaptu, khalh ngiltu, tul a tih anga eng hunah pawh thurawn petu leh zilhhau ngaite zilhhautu ni turin "Val Upa Council" hi din nghal a ni, an ti.
ZPM VUC thuchhuah chuan, ZPM sorkar siam a nih hmaa party a nih lai pawhin theihtawp chhuahin party khalh ngil hna thawkin zilhhau ngaite a zilhhau thin tih an sawi a. A tir atanga vawiin thleng hian thla khat danah emaw vawikhat tal meeting neih a nih thin thu leh sorkar hnathawh kal lai mekah enpui ngai leh thurawn pek ngaite a awm a nih chuan a tul angin hma an lak vat thin thu an sawi.
VUC thuchhuah chuan, March ni 7/2026-a VUC meeting chuan kum hnih chhunga ZPM Ministry hnathawh hrang hrangte thlir letin, sorkar thiltih hlawhtlinte ngun takin a ngaihtuah a. Tui, electric, gas, kawngpui, ration buhfai, sorkar office inrelbawlna, corruption do thu-ah leh thildang tam taka hnathawhah a thalam zawnga hmasawnna nasa tak a awm niin kan hria a. Duhthusam ang chu pha vek lo mah se kan hruaitute inpekna thuk tak avangin leh Mizoramah rorelna tha tundin tuma tih tak zeta an thawh avangin Val Upate chuan lawmawm kan ti hle a ni. Chak tak leh huai taka hma la zel turin duhsakna sang ber kan hlan e, an ti a ni.
