Eirawngbawlna Gas renchem chungchanga Supply Department thuchhuah
Dated Aizawl, the 17th March, 2026 : Tun lai khawvel geo politics boruak avangin mipuiten eirawngbawlna gas-ah harsatna an tawh loh nan India Sawrkar chuan theihtawpin hma a la reng a, State Sawrkar pawhin mipuiten harsatna an tawh loh nan chak takin hma a la reng bawk a ni.
Tun dinhmunah nitina Mizoram mipuite mamawh zat LPG chu bur 7,900 vel a ni a. LPG Distributor hrang hrangah harsatna lian tham awm lovin LPG a thleng mek zel a. Tin, Mizoramin LPG kan lak luhna, IOCL Bottling Plant, Borkhola ah pawh harsatna awm lovin kan State mamawh ang tawk lak zel a la ni.
India sawrkarin mipuiten tul lova LPG bur an chhekkhawl loh nan LPG booking tih hnuhnun ber atanga booking tih leh theih hun inkar chu ni 25-ah a rawn bituk thar bawk a.
Hetiang boruak kaihhnawihah hian mi duham thenkhatin tul lova LPG bur an chhekkhawl leh, man to zawka dan lova an hralh chhawn loh nana hma la turin dated 17.03.2026 hian Sawrkarin State Level leh District Level Monitoring Cell a din thar a. He Cell hian mipuiten an chanvo dik tak leh a mamawh tak tak ten LPG bur an dawn theih nan hma a la dawn a ni.
Hetianga chak taka State Sawrkarin hma a lak avang hian mipuite chiai lo tur leh, tul lova LPG chhekkhawl lo turin Sawrkar-in mipui te a ngen tak meuh meuh a, LPG pawh renchem taka hmang turin mipui te a ngen bawk a ni.
