Endiktu hrang hrang vangin nitin hna thawhin a tawrh phah.
Central YMA Road Monitoring Committee chuan, Sairang leh Vairengte inkar National Highway kawngpui siam ṭhat mek chu an endik a. Hnathawktu Contractor hrang hrangte hmasawn dan chu ṭha thawkhatah an ngai a. Tan lak nasat zual ngai Contractor, J. Infratech Limited chu hnathawktu tam zâwk lak belh tur leh, hun tiam chhunga hna thawk zo hman ngei tûrin an hrilh bawk.
Sairang Zero Point aṭanga Buichali Bridge inkâr te, New Khamrang atanga Kawnpui leh Kolasib atanga Bilkhawthlir kawng te siamtu Contractor, J. Infratech Limited ten hna thawh zawh hun tura an intiam hun, April ni 30 a an hna an thawh zawh vek hman loh an hlauh thu, Central YMA hruaitute chuan an hrilh a. A chak thei ang bera thawk chhunzawm zêl tûr leh, hnathawktu pawh a tam thei ang ber lâk belh turin an hrilh bawk.
Sairang leh Vairengte kawngpui siam hna kal mekah hian, Buichali Bridge atanga New Khamrang inkar thawktu Contractor, BRC Company te chuan tun March thla chhung hian thawh zawh vek hman an tum thu Central YMA hruaitute hi an hrilh a. Kawnpui leh Kolasib leh Bilkhawthlir leh Vairengte inkâr kawng siamtu Contractor, Balaji Constructions Company te chuan hna an thawk zo thawkhat tawh tih an hmu bawk a ni.
Kawng siamtu contractor-te hian an harsatna tawh hrang hrangte leh, puih an ngaihnate Central YMA hruaitute hnênah an lo thlen bawk a. Duh anga hna an thawh chak tawk theih lohna chhan an sawi pakhat, kawng siam endiktu an tam lutuk leh, endiktu hrang hrang an rawn kal apianga contractor lama a hmuna ṭhutchiltu zingah, a hotu lu ber ten ṭawiawm zêl a ngaih ṭhin avanga, an nitin hna thawhin a tawrh phah thu an sawi a, endiktu hrang hrang ten hnathawh hmasak tur chungchangah, duh dan hrang an neih ṭhin avanga, contractor ten harsatna an tawh thu an sawi bawk a. A theih chin chinah NHIDCL leh Contractor ten, ruahmanna an siam lawk anga hna thawhtir theih nise an duh thu an sawi ve bawk a ni.
