Vawiin ni 4 October, 2025 khan Excise & Narcotics Department Minister Lalnghinglova Hmar chuan Vairengte-a Excise Check Gate a tlawh a, tunhnaia an hmasawnna chu lawmawm a tih thu sawiin fimkhur leh taima zual turin a chah.
Excise Minister chuan tunhnaiah Excise & Narcotics-a thawkte thahnemngaihna zarah ruihhlo man a pung a, Vairengte Check Gate a thawkte pawh an thawhrimna leh hmasawnna chu lawmawm a tih thu a sawi a. Sorkarin Excise & Narcotics Department a ngaipawimawh tih sawiin, kum 2024 chhungin district thar pathum Saitual, Khawzawl leh Hnahthial-ah te Excise Station hawn thar a ni a. Department chak lehzual nan post thar 12 siam niin, thawktu indaih lohna phuhru turin direct recruitment hmangin mi 16 lak an ni tawh a, midang 33 lakna tur a kal mek bawk a ti a. Ruihhlo do kawnga pawimawh tak motor thar 18 (LMV – 14 leh Two-wheeler – 4) lei thar bakah LMV hman mek pathum chu Mizoram sorkarin a pek thu a sawi bawk.
Excise Minister chuan, Police nen tangkawpa ‘Ruihhlo Do Beihpui’ kalpui mekah Excise & Narcotics Department chuan mawhphurhna lian leh pawimawh tak kan nei a. Sorkarin min duhsak a, kawng hrang hrangin department min thuamchak a, chumi thung rul tur chuan ṭha zawka thawh a ngai a. Vairengte chu hmun danga Excise awmte aia langsar an nih avanga fimkhur leh taima zual turin a chah bawk a ni.
Excise Minister hi Vairengte OC Inspector Malsawmdawngzela’n a lo dawngsawng a. Tun dinhmunah Excise & Narcotics Station, Vairengte-ah hian Inspector pakhat, Sub Inspector pahnih, Head Constable pahnih, Wireless Operator pahnih leh Constable 11 an awm mek a ni.
