Excise & Narcotics Department chuan Methamphetamine thahnem tak an man.
Excise & Narcotics Department chuan April ni 15, 2026 (Nilaini) chawhma dar 11:40 khan Folkland Park bul, Falkland veng-ah Methamphetamine 10.021 Kgs (Tablet 1,00,000) leh a neitu nia puh mi pahnih Jakaria Hussain (28) s/o Nazrul Hoque, Dholcherra, Karimganj, Assam leh Taj Uddin (25) s/o Abdul Mannan, Nagharia, Karimganj, Assam nia inchhalte chu an man a. Methamphetamine phurhna atana an hman lirthei, Maruti Wagon R Car (Regn No. AS01 FG-7776) pawh hrensak nghal an ni.
He case chhuina kal zelah Myanmar atanga heng methamphetamine man takte rawn kengtu Lalnunziri (38) d/o Chuangkima, Khawmawi, Myanmar nia inchhal chu tlai dar 4:30 khan Khatla-ah an man a. Methamphetamine phurh kualna atana lo puitu, Vanlalrintluanga (27) s/o Zokhuma, H/No. B-1 B/1, Armed Veng South, Aizawl nia inchhal pawh tlai dar 7:00 khan an man bawk a. Methamphetamine chungchanga indawrna atana hman, mobile phone 5 pawh an mi mante kut atang hian an man bawk.
Methamphetamine te hi Assam-a thehthang tura tih mek lai a ni a. Methamphetamine vanga mante hi Section 21(c) of The Narcotic Drugs &Psychotropic Substances Act, 1985 (NDPS Act) hmangin thubuai siamsak an ni a, Special Court (NDPS Act), Aizawl-ah hruai nghal an ni. Court-ah thiamloh an chang a nih chuan Kum 10 atanga kum 20 Jail tang tur leh pawisa Cheng Nuai 1 atanga cheng Nuai 2 thleng chawi bawk tura hrem theih an ni ang.
Excise & Narcotics Department hian April ni 21, 2026-a AMC inthlan lo awm tur denchhenin Special Drive an kalpui mek bawk a, kumin (2026) chhung hian Heroin Kg 7.238, Methamphetamine Kg 49.392, Ganja Kg 90.836 leh ruihtheih thil dang engemaw zat an man tawh a ni.
