FSL in thla 9 chhungin thil chi hrang 8561 endik tawh
Home department hnuaia Mizoram Forensic Science Laboratory (MFSL) chuan kumin hian January ni 1 atanga September ni 30 thleng khan thubuai 1,077-ah thil chi hrang hrang 8,561 an endik tawh.
Mizoram FSL hian kum 26 chhungin thubuai hrang hrang 16,309-ah pawikhawihna thleng kaihhnawih thil chi hrang nuai 1, sing 8, sang 3 leh 568 an endik tawh. FSL hotute hnen atanga thudawn danin, Forensic mithiamte chuan pawikhawihna hmunte endikin finfiahna awm theite an la khawm thin a. Court, Police, Excise & Narcotics leh department hrang hrang atanga endik tura tihte leh, Mizoram pawn atanga thubuai kaihhnawih rawn thawnte an endik thin. Tunah hian kutze thla (fingerprint) 10,920 an chhinchhiah tawh a ni.
FSL-ah hian director ho-in forensic expert 14 leh thawktu dang 31 awmin, an vaiin mi 45 an ni a. Division hrang hrang - Chemistry (Drugs & Narcotics), Questioned Documents, Ballistics & Toolmarks, Fingerprint, DNA, Toxicology, Photography leh Cyber Forensic-te a awm.
Mizoram Forensic Science Laboratory hi kum 1998 khan CID (Crime) hnuaiah branch pakhat anga din niin, July ni 31, 2000 khan Police Headquarters hnuaiah dah a ni a. March ni 13, 2015 khan Home department hnuaiah directorate puitlingah hlan kai a ni.(Thu lakna AIR Aizawl)
