Guwahati Airport Terminal thar vawiin atanga hman tan a ni.
Guwahati khawpuia Lokapriya Gopinath Bardoloi International Airport (LGBIA) Terminal thar chu vawiin atang khan hman tan a ni.
He terminal thar hi nikum 2025 December ni 20 khan Prime Minister Narendra Modi cuhan hawngin he Terminal hi ramchhung mai bakah rampawna thawhna hmanga zin mite tan a tangkai dawn hel a, terminal changkang tak niin khualzin tam tak dawl zo tura ruahman a ni a, tangkai taka hman tura ruahman a ni.
Guwahati Airport hi ramchhunga Airport lun zual 10 zinga tel niin mipui maktaduai 13 chuangin an tlawh thin nia chhut a ni a, ramchhung leh rampawn pan tur thlawhna 20 chuang he hmun atang hian an thlawk thin a, Terminal pawimawh tak niin tunlai thiamna hmanga changkang taka duan a ni.
Vawiina bultan ni ah hian Assam Chief Minister Dr Himanta Biswa Sarma leh Adani Airport Holdings Ltd (AAHL) Director Pu Jeet Adani chu telin Terminal atanga thawhna chhuak hmasa ber Akasa Air chu an thlir liam a, Chief Minister chuan Assam state hmasawnna tur leh hmarchhak bial hmasawnna tura sawrkar laipui bakah Adani Airport te inpekna chu chhuanawm atih thu sawiin hei hian ram hmasawna mai piah lamah hmarchhak bial tan hmundang pan theihna tur kawng awlsam a siam dawn a ti a, tangkai taka hman ani dawn tih a sawi.
Adani Airport Holdings Ltd (AAHL) Director Pu Jeet Adani chuan hmarchhak bial hun rei tak chhung hmasawnna lian tham awm tawhloh hnuah Sawrkar hmalakna in hmasawnna lian tham hmuh tur a awm chu lawmawm atih thu a sawi a, Guwahati hmasawnna chu Assam hmasawnna chauh nilovin India in Asia ram dangte a thlunzawm theihna tura kawng pawimawh ani tih sawiin hmarchhak biala cheng ten hmun dang an pawh theihna tur kawng awlsam anih thu a sawi bawk.
Guwahati khawpui hi tunhnaia ramchhunga khawpui thang chak ber pawl niin Airport pawh hi ramchhung hmundang 21 lai a tlawh bakah Bangkok, Paro leh Singapore direct flight a awm bawk a, thlawhna dang awm belh zel tura beisei niin Airport hi tunlai thiamna hmangin mau hmanga mawi tak leh changkang taka duan a ni a, a design mawi em avang hian International Architecture Award 2025 alo dawng tawh a ni.
