Hmar Students' Association (HSA) Joint Headquarters, Aizawl buatsaihin vawiin khan Art & Culture Auditorium, Berawtlang-ah HSA Day vawi 87-na lawmna leh Freshers Social hun hman a ni a, Speaker Lalbiakzama a hmanpui.
Speaker Lalbiakzama chuan, "Hmar hnam hi Zofate ram delh chinah chuan a daidotu in ni a. Hmar lama Zofate kulh bang, kan hnam ralvengtu santiri in ni, in awmnaah hian awm ta lo ula, hei ai hian Zofate ram luah chin hi a zim dawn tih hi a chiang em em a ni, a ti a. Chutiang taka kan hnam himna pal lo ping tura hnam huaisen in lo awm hi Mizo hnam tan pawha kan vanneihna a ni, a ti bawk.
HSA Joint Headquarters, Aizawl President Lalramliana Ralsun chuan, HSA member kalkhawmte fuihna thu sawiin, "Hmar nula tlangval chu a rinawm a, hnaa chhawr atan pawh an taima a, Hmar ngei an ṭha," tih chu miin min sawi dan ni ṭhin se, chumi ni tur chuan theihtawp chhuah tlang ang u," a ti a.
Hnam a kan chian dan leh kan intih-Hmar danah pawh mi dang tana hnawksak lo zawnga awm ṭhin nise, Hmar takin a Mizo theih a, Mizo takin a Hmar theih, a ti bawk.
Hmar Students' Association (HSA) hi October 3, 1939 khan Imphal, Manipur-ah din a ni a, Mizoram-ah chuan, July 13, 1986 khan Pu Thangliensung a in, Electric Sihpui Veng, Aizawl-ah din a ni. HSA hnuaiah hian India state leh khawpui hrang hrang ah Joint Headquarters 13 leh branch 6 lai a awm a, joint headquarters leh branch hnuaiate hian unit 100 chuang a awm a, Mizoram bikah joint headquarters pathum Aizawl, Kolasib leh Sinlung Hills te an awm a ni.
