Vawiin khan MizoramTourism leh Ministry of Tourism tangkawp buatsaih Travel Fest 2025 ni hnihna chu Aijal Club-ah neih chhunzawm leh a ni a. Chief Minister Lalduhoma'n a hmanpui.
Chief Minister chuan, Mizoramah Tourism Industry hi nasa takin a thang chho mek a, kum hmasa statistics atanga kan hmuh danin khualzin hi 139.50% laiin an pung a. Mi nuai nga leh singhnih chuan an rawn zin a, kan ram mipui zatve deuh thaw a ni a. Rel lo lut hian nasa lehzualin a ti pung ngeiin a rinawm, a ti.
Chief Minister chuan, mipuite hi mikhual nei thiam, hnam dangte khawsakpui thiam kan nih a ngai tih sawiin, kan ramah hnam dangte ngaihngam takin an rawn zin thei tur a ni a. Zo nun ze mawi, tlawmngaihna leh rinawmna, hawihhawmnate kan lo chawi nun thiam chuan sum leh paiah chauh hlawkpui lovin kan ram leh hnam hi a lo par vul tel dawn a ni, a ti bawk.
Mikhual lo kal tam ber turte hi Vai kan tih mai, kan Indianpuite an ni dawn tih sawiin Chief Minister chuan, tumah hi lo hlauh ngawt tur an ni lo a, lo hmuhsit tur pawh an ni hek lo a. Dan ang taka rawn zin, an haw a huna haw ve leh mai tur an ni a. Kan rama sum leh pai an rawn thlauh kha kan tan a tha em em a ni, a ti.
Hma kan sawn zel theih nana kan mamawh dik tak hriat zel a tul thu sawiin, hmalakna tur dik takah zel kut hi thlak chat chat ila, kan resource neih ang angte hlawk takin kan hmang thei dawn a. Chumi atana tangkai Mizoram Travel Fest 2025 kan buatsaih hi a hlu a. A ngaihtuah chhuaktu kan Minister leh a thawhpuite chungah lawmthu ka sawi a ni, a ti bawk.
Tourism Minister Lalnghinglova Hmar pawh in, Tourism hmasawnna tura sorkar hmachhawpte a tarlang sawiin, Tourism department leh EF & CC te chuan Eco-Tourism kalpuina tur inremna (MoU) an ziak bawk.
Steve Borgia, Founder, INDeco chuan "Role of Community Partnership in Sustainable Tourism" tih thupuia hmangin thu a sawi bawk a, chawhnu lamah zirhona leh sawihona dang an neih chhunzawm bawk a ni.
