Vawiin khan Home Minister K. Sapdanga hovin Mizorama rel lo lutin nghawng hrang hrang a neihte thlirho a ni. Meeting-ah hian Sairang Rel Station a Inner Line Permit (ILP) pekchhuah a nih dan thlirho a ni a. Rel station-ah te hian documents nei fello chunga luh ruk kawng a awm em tih te thlirho a ni a, DC leh SP Aizawl tangkawpin hetiang a thlen theih leh theih loh hi a hmunah chiang zawkin lo finfiah se an ti.
Kolasib SP David H. Lalthangliana, chuan Kolasib District chhunga ILP pek chhuah a nih dan report a pe a. ILP pekchhuah buaipui tur hian Bairabi-ah mi 8, Hortoki-ah mi 2, Kawnpui-ah mi 2 leh Mualkhang-ah mi 2 duty dah an nih thu a sawi a. Kolasib chhunga rel station-ah bik hian ILP 38 pek chhuah a nih tawh thu a sawi a. Sairang thlenga rel service a awm hnu atangin Vairengte a ILP pek chhuah leh Inter-state sumo service chu 30%-40% vel laiin a tlahniam niin an hriat thu a sawi bawk.
Addi. SP Aizawl Lalringliana Pachuau pawh in Sairang Rel Station a ILP pekchhuah dan a report a. Rel station hawn tirh, 13.09.2025, atangin counter pali siam a ni a. A tirah police pariat duty dah niin tunah hian paruk dah belh leh an ni tawh a. Ni 08.10.2025 thleng khan ILP 4,064 pek chhuah tawh an ni a. Kutdawh pali leh ILP nei lova Mizoram lo lut mi pali man chhuah an ni a, heng mite hi thawn let leh an ni. Hei bakah hian Sairang Zero-Point ah a khat tawkin ILP surprise checking neih thin a nih thu a sawi bawk.
Meeting hian rel station-a ILP pekchhuah mek dan leh hmasawn zel ngaihna lai te an ngaihtuah mai bakah Government Railway Police din a nih chungchang pawh an sawiho bawk a ni. Tourist ILP neite chu Tourism Department-a an in report dan tur pawh ruahmanna siam a ni bawk.
Meeting-ah hian Chief Secretary Khilli Ram Meena, IGP (Headquarters) H. Ramthlengliana, Home Secretary Vanlalmawia Renthlei, Transport Department Secretary Zosangliana te bakah Aizawl leh Kolasib District a sorkar official pawimawh te an tel a ni.
Meeting hian Home Minister leh Chief Secretary hovin Sairang rel station chu Mizoram-a passenger lo thlen tam ber, Guwahati – Sairang service, a lo thlen hunah tlawh ni se an ti a. A hun atan hian ni 14.10.2025 (thawhlehni) zing dar riat ruat a ni bawk.
